औरंगाबाद - चॉकलेट, बिस्कीट विक्रीच्या नावाखाली गुटख्याचा धंदा करणाऱ्यावर छापा घालून सिडको पोलिसांनी एक लाखाचा माल जप्त केला. यात एका संशयिताला ताब्यात घेतले. ही कारवाई मंगळवारी (ता. पाच) रात्री दहाच्या सुमारास करण्यात आली.

मिसारवाडीत गुटखा साठवणूक व विक्री होत असल्याची माहिती सिडको पोलिसांना समजली. त्यानंतर त्यांनी मिसारवाडीच्या गल्ली क्रमांक दहामध्ये बासित अन्सारी याच्या घरावर छापा घातला. त्यावेळी त्याने पळून जाण्याचा प्रयत्न केला, परंतु दरवाजासमोर पोलिसांनी आडवे येत त्याला पकडले. तो गोळ्या, बिस्कीट, चॉकलेट विक्री करण्याच्या नावाखाली गुटखा विक्री करीत असल्याचे समोर आले. त्याच्या घरातून पोलिसांनी गुटखा व पानमसाला असा सुमारे एक लाखाचा माल जप्त केला. बासितची पोलिसांनी चौकशी केली. त्यावेळी तो मूळ मध्य प्रदेशातील असून एक वर्षापासून औरंगाबादेत रोजगारासाठी आला होता. येथे आल्यानंतर त्याने गुटख्याची विक्री सुरू केली.

पानटपरी चालकांना तो माल विकत होता. त्याला ताब्यात घेत त्याच्याविरुद्ध सिडको ठाण्यात गुन्ह्याची नोंद करण्यात आली. ही कारवाई उपनिरीक्षक भरत पाचोळे, नरसिंग पवार, राजेश बनकर, प्रकाश डोंगरे, स्वप्नील रत्नपारखी, सुरेश भिसे, विजय भानुसे, किशोर गाढे यांनी केली. अन्नसुरक्षा अधिकारी एस. टी. जाधवर यांच्या फिर्यादीवरून सिडको पोलिसांत गुन्ह्याची नोंद करण्यात आली.