पाथरूड (जि.उस्मानाबाद) : देशाला स्वातंत्र्य मिळाल्यानंतर भूम तालुक्‍यातील वडाचीवाडीत सोमवारी (ता. 19) पहिल्यांदा लालपरीचे आगमन झाले. परिवहन महामंडळाने गैरसोय दूर केल्याने नागरिकांतून समाधान व्यक्त होत आहे.

पाथरूड परिसरतील बालाघाट डोंगराच्या कुशीत वसलेल्या वडाचीवाडी येथे स्वातंत्र्यप्राप्तीच्या अनेक वर्षांनंतरही अद्याप एसटी बस पोचली नव्हती. बससेवा सुरू नसल्याने ग्रामस्थांना खासगी वाहनाने किंवा पायी प्रवास करीत अनेक समस्यांना तोंड द्यावे लागत होते. वडाचीवाडीतील विद्यार्थ्यांना पाथरूड येथे शिक्षण घेण्यासाठी दररोज पायी ये-जा करावी लागत होती.

 
भूम आगार व युवा सेनेच्या पाठपुराव्याने वडाचीवाडी येथे सकाळी साडेआठ वाजता गिरलगाव-भूम ही पाथरूडकडे जाण्यासाठी, तर सायंकाळी साडेचार वाजता पाथरूडहून भूम-गिरलगाव अशा दोन बसफेऱ्या सुरू करण्यात आल्या आहेत. आज सकाळी पहिल्यांदाच वडाचीवाडी येथे एसटी बसचे आगमन झाल्याने ग्रामस्थांनी स्वागत केले. सरपंच जालिंदर सलगर, उपसरपंच भाऊसाहेब माने व ज्येष्ठ नागरिक नवनाथ माने यांच्या हस्ते बसचे पूजन करण्यात आले.

युवा सेनेचे जिल्हाप्रमुख डॉ. चेतन बोराडे, माजी सरपंच बाबासाहेब माने, अंगद गावडे, भाऊ माने, अनिल माने, अर्जुन माने, सिदा नेरे, ब्रह्मदेव माने, ईश्वर माने, अजिनाथ वीर, रावसाहेब माने, दत्ता माने यांच्यासह शालेय विद्यार्थी व महिला मोठ्या संख्येने उपस्थित होत्या. स्वातंत्र्योत्तर काळात प्रथमच गावात बस आल्याने नागरिकांत आनंदाचे वातावरण होते. ग्रामस्थांकडून चालक व वाहकाचा सत्कार करण्यात आला.