भोकरदन  (जि.जालना) - सर्व तयारी झालेली होती; पण पाऊस काही थांबायचे नाव घेत नव्हता. दिवसभर रिपरिप, नुसता चिखल झालेला. प्रयत्न निष्फळ ठरले आणि चांद्रयानावर पावसाने पाणी फेरले. भोकरदनच्या गणेश मंडळ कार्यकर्त्यांचा बुधवारी (ता. 11) हिरमोड झाला. 

भोकरदन शहरातील देशमुख गल्लीतील छत्रपती शिवाजी महाराज गणेश मंडळाचे कार्यकर्ते म्हणजे नावीन्याचा ध्यास घेणारे. दरवर्षी नवीन काहीतरी करावे यासाठी प्रयत्न आणि परिश्रमाची शिकस्त. गणेशोत्सवाचा शेवटचा दिवस म्हणजे देखावे सादर करण्याची पर्वणीच. शिवाय भोकरदनला तशी परंपराही. त्यामुळे प्रत्येक गणेश मंडळाचे कार्यकर्ते सजीव-निर्जीव देखावा सादर करण्यासाठी दिवसभर कष्ट घेतात तसा देशमुख गल्लीतील मंडळानेही यंदा मोठ्या कौतुकाने 'चांद्रयान' प्रोजेक्‍ट हाती घेतला. त्यासाठी लागणारे सर्व साहित्य आणले. चांद्रयानचे मार्क- 3  प्रक्षेपकही तयार केले. मात्र, बुधवारी पाऊस काही थांबायला तयार नव्हता. त्यामुळे देखावा उभारणीही अशक्‍य बनली. पावसात भिजत काही हौशी कार्यकर्त्यांनी कसेबसे उपग्रह प्रक्षेपक यान उभेही केले; पण सायंकाळनंतर मात्र पावसाचा असाकाही जोर वाढला की प्रयोग काही पुढे गेला नाही. अपेक्षित टप्पा गाठता आला नाही. 

छत्रपती शिवाजी महाराज गणेश मंडळातर्फे आम्ही यंदा चांद्रयान मोहीम देखावा सादर करणार होतो, मिशन मंगलही देखावा तयार करण्याचा विचार होता. मात्र, सततच्या पावसामुळे यात व्यत्यय आला. तरिही कार्यकर्त्यांनी पावसात भिजत चांद्रयान देखावा उभारण्यासाठी मेहनत घेतली; मात्र पावसामुळे प्रयोग पुढे नेता आला नाही. 
सतीश तुपे, 
अध्यक्ष, गणेश मंडळ