सेलू (जि.परभणी) : शहरातील छत्रपती शिवाजी महाराज पूतळा ते नगरपालिका रस्त्यावरील वसंतराव खारकर काॅम्प्लेक्सवरील दूसर्‍या मजल्यावरील अनाधिकृत १४ गाळ्यांना नगरपालिका प्रशासनाने सोमवारी (ता.१७) रोजी सील ठोकले. मागील अनेक दिवसांपासून शहरातील या मुख्य रस्त्यावरील वसंतराव खारकर काॅम्प्लेक्समधील दूसर्‍या मजल्यावरील नवीन १४ गाळ्यांचे बांधकाम सूरू होते. रविवार रात्रीच्या वेळी संबधित गाळ्यांना लोखंडी शटर बसविण्याचे काम सूरू होते. आयुक्तांनी या जागेवर कूठल्याही प्रकारचे काम करू नये अशी स्थगिती दिली होती. मात्र असे असतांना (Parbhani News) या ठिकाणी काम सूरू होते. सदरील जागा नगरपालिकेच्या मालकीची आहे. असे असतांनाही नगरपालिका (Selu) प्रशासनाचा आदेश संबधित गाळधारक मानायला तयार नाहीत. मागील अनेक महिन्यांपासून या जागेवर बांधकाम होत असतांना पालिका प्रशासन काय करते हा प्रश्न या निमित्ताने उपस्थित होत आहे. (Illegal 14 Shops Sealed In Selu By Municipal Council)

शहरात अनेक मुख्य रस्ते हे अतिक्रमणाच्या विळख्यात आले आहेत. नगरपालिका प्रशासन नेमके काय करत आहे? हे समजायला तयार नाही. अतिक्रमणधारक पालिकेच्या कूठल्याही परवानगीशिवाय आपले दूकाने ठाण मांडून बसले आहेत. या अतिक्रमणधारकांवर पालिका प्रशासन का कार्यवाही करत नाही हा प्रश्न उपस्थित होत आहे. मात्र पालिकेने उशीरा का? होईना या अनाधिकृत गाळ्यांचे काम बंद पाडले ही कार्यवाही मुख्याधिकारी निलेश सुंकेवार नितीन गरूडकर, नितीश शिजाते, सुरेश भांडवले, मलिकार्जून स्वामी, रामराव पवार यांनी केली.

पालिकेची परवानगी नाही

शहरातील वसंतराव खारकर काॅम्प्लेक्सवरील दूसर्‍या मजल्याच्या कामास आयूक्तांनी स्थगिती दिली. तसेच संबंधित गाळेधाराकांनी पालिकेची कूठलीही परवानगी बांधकामासाठी घेतली नसल्याने सदरील १४ गाळ्यांना सील ठोकले असून संबंधित गाळेधारकांवर पालिका योग्य कार्यवाही करणार असल्याची माहिती मुख्याधिकारी निलेश सुंकेवार यांनी दिली.