लातूर : चित्रपट महोत्सवाच्या माध्यमातून जागतिक चित्रपट दाखवण्याचा प्रयत्न केला जात आहे. यातून मराठी दिग्दर्शकांना स्फूर्ती मिळत असून दर्जेदार चित्रपटांची निर्मिती होत आहे, अशी माहिती ज्येष्ठ चित्रपट दिग्दर्शक डॉ. जब्बार पटेल यांनी येथे दिली.

महाराष्ट्र शासन, विलासराव देशमुख फाउंडेशन, पुणे फिल्म फाउंडेशन व अभिजात फिल्म सोसायटी यांच्यातर्फे जगभरातील सर्वोत्कृष्ट चित्रपट रसिकांपर्यंत पोचवणारा दुसऱ्या लातूर आंतरराष्ट्रीय चित्रपट महोत्सवाचे उद्‌घाटन गुरुवारी (ता.१५) येथे झाले. यावेळी ते बोलत होते. कार्यक्रमाला माजीमंत्री आमदार अमित देशमुख, खासदार सुधाकर शृंगारे, आमदार विक्रम काळे, समर नखाते, विशाल शिंदे, मुख्य कार्यकारी अधिकारी अनमोल सागर, निवासी उपजिल्हाधिकारी विजयकुमार ढगे, उपविभागीय अधिकारी रोहिणी नऱ्हे आदींची उपस्थिती होती.

पुणे फिल्म फाउंडेशनच्या माध्यमातून हा उपक्रम सुरू करून २२ वे वर्ष होत आहे. राज्यभरात हा उपक्रम जात आहे. लातूरचे रसिक नाटक, सिनेमाप्रेमी आहेत. सध्या जगावर युद्धाचे सावट आहे. त्यातून ‘सिनेमा इज होप’ ही थीम घेऊन आम्ही लातूरला आलो आहोत. याचा रसिकांनी लाभ घ्यावा. पुढच्या वर्षी या महोत्सवात मराठी सिनेमात नव्याने पदार्पण करणाऱ्या अभिनेता, अभिनेत्रीला पारितोषिक द्यावे, हिंदी चित्रपटातील ज्येष्ठांचा गौरव करावा तसेच लातूरच्या कलावंतांसाठी शॉर्टफिल्मची स्पर्धा घ्यावी, अशी सूचना डॉ. पटेल यांनी केली.