जिंतूर : जिंतूर-परभणी महामार्गावर पांगरी जवळील येसेगाव पाटी जवळ छोटा हत्ती वाहन व दुचाकीचा भीषण अपघात झाला. यात दुचाकीस्वाराचा जागीच मृत्यू झाला. सदरची घटना शुक्रवारी (ता.२४) सायंकाळी साडेपाचच्या सुमारास शहरापासून सहा किलोमीटरवर घडली. एकनाथ मारोतराव राऊत (वय ३०, रा. दुधगाव ता. जिंतूर) असे अपघाग्रस्ताचे नाव आहे.

सूत्राच्या माहितीवरून एकनाथ राऊत हे एमएच २२ ऐ जे ७२७३ क्रमांकाच्या दुचाकीवरून परभणीकडे जात असताना समोरून जिंतूरकडे येणारा छोटा हत्ती (पॅजओ) (क्र.एम एच ३० ऐ व्ही ०९९१) या दोन वाहनांची परस्पर जोराची टक्कर होऊन अपघात झाला. अपघातात दुचाकीस्वार एकनाथ राऊत हे गंभीर जखमी होऊन रक्तबंबाळ अवस्थेत रस्त्याच्या बाजूला पडले.

अपघाताची माहिती समजताच सामाजिक कार्यकर्ते नागेश आकात व पोलीस कर्मचार्यांनी घटनास्थळी धाव घेऊन जखमीला शहरातील खाजगी रुग्णवाहिकेद्वारे ग्रामीण रुग्णालयात दाखल केले असता वैद्यकीय अधिकारी डॉ.गजानन काळे यांनी तपासून त्यास मृत घोषित केले. सदर घटनेची माहिती मिळताच नातेवाईक व ग्रामस्थांनी रुग्णालयात एकच गर्दी केली होती. अपघातातील मृतकास पत्नी,एक मुलगा व एक मुलगी आहे.या बातमी देईपर्यंत पोलीस ठाण्यात घटनेची नोंद झालेली नव्हती.