लातूर : महानगरपालिकेच्या सार्वत्रिक निवडणुकीसाठी प्रभाग रचना तयार करण्याच्या सूचना राज्य शासनाच्या नगरविकास विभागाने महापालिकेच्या आयुक्तांना दिल्या आहेत. २०१७ नुसारच प्रभाग रचना होणार असल्याने लातूर महापालिकेत ७० नगरसेवकच राहणार आहेत. लोकसंख्या वाढल्याने वाढीव ११ नगरसेवक येणार याला आता पुर्णविराम मिळाला आहे.

महापालिकेचे आयुक्त बाबासाहेब मनोहरे यांनी तातडीने बुधवारी महापालिकेच्या निवडणूक विभागाची बैठक घेत प्रभाग रचनेचा कच्चा आराखडा तयार करण्यास सुरवात केली आहे.

राज्यात महापालिकेची प्रभाग रचना तीन सदस्यीय असावी की चार सदस्यीय असावी याचा घोळ गेल्या काही महिन्यापासून सुरु आहे. त्यात वाढीव लोकसंख्येनुसार प्रभाग रचना करावी असे आदेश काही महिन्यापूर्वी शासनाने दिले होते. यानुसार लातूर महापालिकेचे ११ नगरसेवक वाढणार होते. एकूण ८१ नगरसेवक होणार होते. यात २७ प्रभागही होणार होते. त्या दृष्टीने महापालिकेने यावर हरकती व सूचना मागवल्या होत्या. त्यावर सुनावणीही घेण्यात आली होती. त्यानंतर राज्यातील शासन बदलले. पुन्हा प्रभाग रचनेचा संदर्भात वेगळा निर्णय घेण्यात आला. हे प्रकरण न्यायालयातही गेले. आता ता. २२ नोव्हेंबर रोजी नगर विकास विभागाने राज्यातील महापालिकेच्या आयुक्तांना एक आदेश दिले आहेत.

मुंबई महानगरपालिका अधिनियम, १८८८ व महाराष्ट्र महानगरपालिका अधिनियम, १९४९ मध्ये संदर्भिय अधिनियमानुसार सुधारित केलेल्या तरतूदीप्रमाणे मुदत संपलेल्या व नजीकच्या कालावधीत मुदत संपत असलेल्या महानगरपालिकांच्या आगामी सार्वत्रिक निवडणूकीसाठी लगतच्या जनगणनेनुसार प्रभागांची संख्या व रचना निश्चित करुन प्रभाग रचनेचे प्रारूप तयार करण्यासाठी आवश्यक ती कार्यवाही तत्काळ सुरू करण्यात यावी असे या आदेशात म्हटले आहे. त्यामुळे महापालिकेचे आयुक्त बाबासाहेब मनोहरे यांनी तातडीने बुधवारी (ता. २३) निवडणूक विभागाची बैठक घेतली. प्रभाग रचनेच्या कच्च्या आराखडा तयार करण्याची तयारीही सुरू करण्यात आली आहे.

आगामी महापालिकेच्या निवडणुक संदर्भात नगरविकास विभागाचे आदेश आले आहेत. निवडणुकीसाठी २०११ चीच लोकसंख्या गृहित धरली जाणार आहे. त्यामुळे लातूर महापालिकेत ७० नगरसेवक राहणार आहेत. एका प्रभागात किती सदस्य असतील याचे आदेश आलेले नाहीत. सध्या प्रभाग रचनेचा कच्चा आराखडा तयार करण्यात येत आहे.

बाबासाहेब मनोहरे, आयुक्त, महापालिका