हिंगोली : कळमनुरी तालुक्यातील बऊर शिवारामध्ये बिबट्याने एका बैलाचा फडशा पाडल्यानंतर वन विभागाने लावलेल्या कॅमेऱ्यात मंगळवारी (ता. २५ ) बिबट्याचे छायाचित्र आढळून आले. त्यामुळे या शिवारात बिबट्याचे अस्तित्व असल्याचे स्पष्ट झाले आहे.

कळमनुरी तालुक्यातील बऊर शिवारामध्ये शिवाजी कोकरे यांच्या शेतावर बैल बांधले होते. रविवारी  (ता. २३) रात्रीच्या सुमारास बिबट्याने एका बैलास ठार मारले. त्यानंतर बैलास तेथून बाजूला नेले. सोमवारी (ता. २४) सकाळी कोकरे शेतात गेले असता एक बैल दिसला नाही. त्यामुळे त्यांनी परिसरात पाहणी केली असता एका ठिकाणी बैल मृतावस्थेत आढळून आला.  

बैलाच्या परिसरामध्ये वन्य प्राण्यांच्या पायांचे ठसे आढळून आले. या घटनेची माहिती शेतकऱ्यांनी वन विभागाचे अधिकारी केशव वाबळे यांना दिली. त्यानंतर वाबळे यांनी तातडीने घटनास्थळी वनविभागाचे पथक रवाना केले. या पथकाने घटनास्थळावरून जनावरांच्या पावलांचे ठसे घेतले.

सदर ठसे बिबट्याच्या पावलाशी मिळते-जुळते असल्यामुळे वाबळे यांनी या परिसरात दोन कॅमेरे लावले होते. त्यानंतर रात्री या परिसरात जाण्यास मज्जाव करण्यात आला होता. सोमवारी ( ता. २४ ) रात्री साडेसात वाजण्याच्या सुमारास ज्या ठिकाणी बैलाची शिकार केली. त्याठिकाणी पुन्हा बिबट्या आला. त्याने ठार केलेल्या बैलावर ताव मारतानाचे छायाचित्र चित्रदेखील निघाले आहे. आज सकाळी वनविभागाच्या अधिकाऱ्यांनी कॅमेरे ताब्यात घेऊन हिंगोली येथे आणले. या कॅमेऱ्याची तपासणी केल्यानंतर त्यामध्ये बिबट्या स्पष्टपणे दिसून आला. यामुळे या भागात बिबट्याचे अस्तित्व असल्याचे स्पष्ट झाले आहे.

गावकऱ्यांनी तेथे जाऊ नये : केशव वाबळे, विभागीय वन अधिकारी

कळमनुरी तालुक्यातील भाऊ शिवारामध्ये बिबट्याचे अस्तित्व असल्याचे स्पष्ट झाले आहे. साधारणतः  तीन दिवस बिबट्या एकाच भागात राहतो. त्यामुळे गावकऱ्यांनी पुढील आठवडा या भागात जाऊ नये. तसेच शेतामध्ये आठ दहा शेतकऱ्यांनी एकत्र येऊन जावे. कोकरे यांना वन विभागाकडून चाळीस हजाराची मदत दिली जाईल.