औरंगाबाद - प्रामाणिकपणे काम केल्यास आनंद मिळतो. कलाकार असा वेगळा नसतो. उत्तम स्वयंपाक करणे, केर काढणे हीसुद्धा कला आहे. कलाकारांचे फाजील लाड बंद केले पाहिजे. काही दिवस पुरस्कार देणेसुद्धा थांबवले पाहिजे, असे मत ज्येष्ठ अभिनेते डॉ. मोहन आगाशे यांनी मंगळवारी (ता. 12) व्यक्त केले. 

मराठवाडा साहित्य परिषदेतर्फे दिला जाणारा यशवंतराव चव्हाण वाङ्‌मय पुरस्कार "मी लोकांचा सांगाती' या पुस्तकासाठी भाई संपतराव पवार यांना; तर "नटवर्य लोटू पाटील पुरस्कार' डॉ. आगाशे यांना प्रदान करण्यात आला. यावेळी ते बोलत होते. कवी ना. धों. महानोर, डॉ. मनोहर जाधव, डॉ. दिलीप घारे, कौतिकराव ठाले पाटील, प्रकाश पायगुडे यांची प्रमुख उपस्थिती होती. श्री. महानोर यांच्या हस्ते पवार आणि आगाशे यांना पुरस्कार प्रदान करण्यात आला. 

डॉ. आगाशे म्हणाले, "जगण्यासाठी प्रत्येकाला काहीतरी लागते. आपले जगणे अर्थपूर्ण करायचे असेल तर तुम्हाला कुठल्यातरी कला प्रकाराशी मैत्री करावी लागेल. तुम्ही अशी कला निवडा ती कधीच सोडून जाणार नाही. उलट तुमच्या जीवनात आनंदच निर्माण करील.'' डॉ. दादा गोरे यांनी सूत्रसंचालन केले आणि डॉ. रामचंद्र काळुंखे यांनी आभार मानले. 
 
नैसर्गिक संपत्ती, श्रमातून विकास : पवार 
"नैसर्गिक संपत्ती आणि मानवी श्रम यातून विकास करता येतो, हे मला उमगले. चळवळ यशस्वी करायची असेल, तर संवेदनशील माणसांचे कवच लाभले पाहिजे. संकटात लोकांना साथ दिल्यास ते कायम सोबत राहतात. दुष्काळात लोकांना आत्मभान देण्याचे काम करता आले. हाच प्रवास मी लोकांचा सांगाती पुस्तकात मांडला'', असे भाई संपतराव पवार म्हणाले.