औरंगाबाद : वारंवार मागणी करूनही दिव्यांगाच्या योजनांची अंमलबजावणी होत महापालिकेकडून होत नसल्याने संतप्त झालेल्या आमदार बच्चू कडू यांनी सोमवारी (ता. 25) प्रहार संघटनेच्या वतीने महापालिकेसमोर आंदोलन करत आयुक्तांची (प्रतिकात्मक) खुर्ची जाळली. या आंदोलनामुळे काही काळ तणाव निर्माण झाला होता. 

दिव्यांगांच्या कल्याण आणि पुनर्वसनासाठी महापालिकेच्या उत्पन्नातून दरवर्षी तीन टक्के निधी राखून ठेवला पाहिजे, असे शासनाचे आदेश आहेत; मात्र याला महापालिकेतर्फे आदेशाला केराची टोपली दाखविली जाते. सहा महिन्यांपूर्वी प्रहारतर्फे महापालिकेसमोर आंदोलन करण्यात आले होते. यावेळी श्री. कडू यांना महापौर नंदकुमार घोडेले यांनी आश्वासन दिले होते. मात्र कोणतीच कार्यवाही केलेली नसल्याने मागील महिन्यात "प्रहार'ने बेमुदत उपोषण केले होते. त्यावेळी स्वतः आयुक्त डॉ. निपुण विनायक यांनी संघटनेला लेखी आश्वासन दिले. दिव्यांगांना थेट 2 हजार रुपये मासिक मानधन सुरू करण्यात येईल. त्यांना व्यवसायासाठी विविध फुटपाथवर स्टॉल दिले जातील.

महापालिकेच्या व्यावसायिक गाळ्यांमध्ये दिव्यांग व्यक्तींना प्राधान्य दिले जाईल. विविध विभागांत दिव्यांगांना शासकीय व कंत्राटी सेवेत सामावून घेतले जाईल. तसेच घरकुल योजनेमध्येही प्राधान्य दिले जाईल. त्यानंतरही दिव्यांगांच्या हाती काहीच पडले नाही. त्यामुळे त्यामुळे सोमवारी महापालिकेसमोर प्रहार संघटनेतर्फे गाजर वाटप आंदोलन करण्यात आले. दुपारी दीड वाजत आमदार बच्चू कडू आंदोलनात सहभागी झाले व आक्रमक होत यावेळी खुर्ची जाळण्यात आली. त्यानंतर महापौर नंदकुमार घोडेले यांच्या दालनात बैठक झाली व तातडीने दिव्यांगांना धनादेशाचे वाटपही करण्यात आले.