औरंगाबाद : महावितरणच्या धडक मोहिमेत बुधवारी (ता. 13) मिटमिटा परिसरातील गट क्रमांक 157 मध्ये तेरा वीजचोरांवर कारवाई करण्यात आली. 

महावितरणतर्फे वीजचोरीच्या विरोधात धडक कारवाई करण्यात येत आहे. त्याचाच भाग म्हणून मिटमिटा येथे कारवाई करण्यात आली. मिटमिटा येथे मोठ्या प्रमाणावर वीजचोरी होत असल्याच्या माहितीवरून महावितरणच्या पथकाने धडक कारवाई केली. या मोहिमेत वीजबिलाची थकबाकी असल्याने एका ग्राहकाचा वीजपुरवठा खंडित केलेला असतानाही त्याने वीजचोरी केल्याचे उघड झाले. अन्य बारा ग्राहकांनी अधिकृत जोडणी न घेताच विद्युतवाहिनीवर धोकादायक पद्धतीने आकडे टाकून वीजचोरी केल्याचे उघड झाले.

या सर्व ग्राहकांवर विद्युत कायद्याच्या कलम 135 अन्वये कारवाई करण्यात आली आहे. महावितरणच्या शहर विभाग-1 चे कार्यकारी अभियंता प्रेमसिंग राजपूत यांच्या मार्गदर्शनाखाली छावणी उपविभागाचे अतिरिक्त कार्यकारी अभियंता शंकर चिंचाणे, सहायक अभियंता संदीप पवार यांच्या पथकाने ही कारवाई केली.