शिरूर अनंतपाळ(जि. लातूर)  : निटूर (ता. निलंगा) येथील ग्रामपंचायतीने गावाजवळ खोदलेल्या नाल्यात पडून बहीण-भावाचा मृत्यू झाल्याची घटना गुरुवारी (ता. 15) घडली. अदिल महेबूब फकीर (वय 5), जोया महेबूब फकीर (7) अशी मृत भाऊ-बहिणीची नावे आहेत. 

निटूरमधील महेबूब इस्माईल फकीर यांची ही मुले सकाळी घराबाहेर खेळण्यासाठी गेली होती. सकाळी अकरापर्यंतही ती घरी न परतल्याने घरच्यांनी शोध सुरू केला. ग्रामपंचायतने खोदलेल्या नाल्याच्या जवळ मुलांच्या चपला आढळल्या. नाल्यात दोघांचे मृतदेह सापडले. 

या घटनेमुळे संतप्त ग्रामस्थांनी दोन्हीही मृतदेह ग्रामपंचायत कार्यालयासमोर ठेवले.

निष्काळजीपणामुळे ही दुर्घटना घडल्याचा आरोप करून दोषींवर कारवाईची मागणी केली. रक्षाबंधन सणाच्या दिवशीच घडलेल्या या दुर्दैवी घटनेमुळे गावात हळहळ व्यक्त होत आहे.