वसमत - राज्य साखर संघाच्या अध्यक्षपदी माजी मंत्री जयप्रकाश दांडेगावकर, तर उपाध्यक्षपदी श्रीराम शेटे, आबासाहेब पाटील यांची बिनविरोध निवड झाली.

मुंबई येथे साखर संकुलात मंगळवारी संचालकांची बैठक झाली. ग्रामविकासमंत्री पंकजा मुंडे, जयंत पाटील, अजित पवार, दिलीप वळसे पाटील आदींसह संचालक उपस्थित होते.

वसमत (जि. हिंगोली) येथील पूर्णा कारखान्याचे अध्यक्ष असलेल्या दांडेगावकर यांचा सहकार क्षेत्रात चांगला दबदबा आहे. साखर कारखानदारी अडचणीत असतानाही काटकसरीचे धोरण राबवून त्यांनी "पूर्णा'सह बाराशिव हनुमान सहकारी साखर कारखाना (जवळाबाजार, ता. औंढा) चालविण्यास घेतला. दोन्ही कारखान्यांचे व्यवस्थापन यशस्वीपणे करून दाखविले आहे. कारखानदारी यशस्वीपणे सुरू ठेवण्यासाठी उपपदार्थ निमिर्तीही केली पाहिजे, या भूमिकेतून त्यांनी "पूर्णा'द्वारे वीजनिर्मिती प्रकल्प, इथेनॉल, डिस्टलरी प्रकल्पदेखील सुरू केले आहेत.