सोयगाव : झाडावर मोहळ हुलविण्यासाठी गेलेल्या तरुणावर आक्रमक झालेल्या मधमाशांनी जोरदार हल्ला चढविल्याने तो तरूण गंभीर जखमी झाला. मधमाशांच्या तावडीतून वेळीच बाहेर न पडल्याने त्या तरूणाचा झाडावरच मृत्यू झाला. ही घटना गोंदेगाव (ता. सोयगाव) शिवारात सोमवारी (ता.26) सायंकाळी घडली. या घटनेमुळे गोंदेगाव परिसरात खळबळ उडाली आहे.

गोंदेगाव येथील मुकेश सिकंदर तडवी (वय 35) हा शेतातील गट क्र. 29 मध्ये फिरत होता. त्यावेळी त्याला निंबाच्या झाडावरील दाट फांद्यात असलेल्या मधाचे पोळे दिसले. त्या पोळ्यावर डाव मारण्यासाठी तो झाडावर चढला, परंतु त्याचा डावपेच हुकल्याने चवताळलेल्या मधमाशांच्या तावडीत सापडल्याने आक्रमक मधमाशांनी त्याच्या तोंडावर, डोळ्यावर आणि सर्व उघड्या अंगावर चावा घेतला. मधमाशांनी डंक मारल्याने तो गंभीर जखमी झाला. मधमाशांनी त्याचा बराच वेळ चावा घेतल्याने अखेरीस मृतावस्थेत तो खाली पडला.

ग्रामस्थांच्या लक्षात येताच त्यांनी पोलिसांना सदर घटनेची माहिती दिली. सोयगाव पोलिसांनी घटनास्थळी पंचनामा करून तातडीने पुढील उपचारासाठी त्यास पाचोरा ग्रामीण रुग्णालयात दाखल केले. मात्र, डॉक्टरांनी त्याला तेथेच मृत घोषित केले. या प्रकरणी सोयगाव पोलीस ठाण्यात आकस्मिक मृत्यूची नोंद करण्यात आली असून पोलिस निरीक्षक सीताराम म्हेत्रे पुढील तपास करत आहे.