मुंबई - बेकायदा बांधकामप्रकरणी नगरसेविका अरुंधती दुधवडकर आणि पती अरुण यांच्या अडचणी वाढण्याची शक्‍यता आहे. पालिकेच्या पदाचा गैरवापर करत, केलेल्या बांधकामप्रकरणी त्यांच्याविरोधात उच्च न्यायालयात जनहित याचिका दाखल करण्यात आली असून त्यांचे नगरसेवक पद रद्द करण्याची मागणी याचिकेत करण्यात आली आहे. 

सकाळचे मोबाईल अॅप्लिकेशन डाऊनलोड करण्यासाठी क्लिक करा

माहिती अधिकार कार्यकर्ते संजय दुबे यांनी याचिका दाखल केली आहे. अनधिकृत बांधकामप्रकरणी मुंबई महापालिकेकडे तक्रार केल्यानंतरही त्याकडे पालिका दुर्लक्ष करत असल्याचा आरोप याचिकेत करण्यात आला आहे. शिवसैनिक असलेले अरुण दुधवडकरही माजी नगरसेवक होते. सध्या त्यांच्या पत्नी अरुंधती शिवसेना नगरसेविका आहेत. ताडदेवमधील दीपक अपार्टमेंट सुपारीवाला इमारतीत दुधवडकर दाम्पत्याचे घर आहे. ताडदेव टॉवरशेजारील व्हॅलेंटाईन क्‍लबला जोडून एक बांधकाम करण्यात आले आहे. क्‍लबशेजारील मोकळ्या मैदानावरील संरक्षक भिंत वाढवत अनधिकृत बांधकाम केले गेले असून त्यासाठी कोणतीही परवानगी घेण्यात आली नाही असा आरोप आहे. दुधवडकर यांच्या वरदहस्तामुळे बांधकाम झाल्याचा दावा दुबे यांनी याचिकेत केला आहे. येत्या काही दिवसांत याचिकेवर सुनावणी अपेक्षित आहे.