मुंबई ः भिवंडी शहरातील नारपोली देवजी नगर परिसरात असलेल्या स्व. काशिनाथ पाटील रुग्णालयामध्ये  उपचारासाठी दाखल करण्यात आलेल्या जखमी रूग्णांचे नातेवाईक व रूग्णाने तेथील डॉक्टर व कर्मचाऱ्यांशी अरेरावी करीत मारहाण केल्याचा प्रकार उघडकीस आला आहे. या प्रकरणी पोलिस ठाण्यात रात्री उशिरापर्यंत गुन्हा दाखल करण्याची प्रक्रिया सुरू होती.

मंगळवारी मुस्तफा खान असे नाव असलेल्या एका तरुणाला जखमी अवस्थेत अनोळखी इसमाने उपचाराकरता दाखल केले, मात्र या मुस्तफा याची परिस्थिती गंभीर असल्याकारणाने डॉक्टरांनी त्याला आयसीयूमध्ये दाखल केले.

काही वेळानंतर या तरुणाचे नातेवाईक रुग्णालयामध्ये आले व त्यांची गर्दी आयसीयू विभागात वाढू लागल्यान डॉक्टरांनी त्यांना आयसीयूमधून बाहेर जाण्यास सांगितले. या गोष्टीचा राग मनात धरून रुग्ण मुस्तफा खान व नातेवाईकांची डॉक्टरांशी बाचाबाची झाली. यातून नातेवाईक व मुस्तफा यांनी डॉक्टर व कर्मचाऱ्यांना धक्काबुकी करीत मारहाण केली.

तसेच रुग्णालयात तोडफोड करायला सुरुवात केली. हा प्रकार शांत करण्यासाठी आलेल्या डॉ. शाहिद अली खान, डॉ. स्वाती शाहिद खान, विठोबा पाटील, कैलास म्हात्रे  व इतर कर्मचाऱ्यांनाही त्यांनी धक्काबुकी करत मारहाण केली. या प्रकरणी नारपोली पोलिस ठाण्यात तक्रार दाखल करण्यात आली असून पोलिसांनी जाब जबाब घेत गुन्हा दाखल करण्याची प्रक्रिया सुरू केली आहे.

घटनेचा संपूर्ण प्रकार रुग्णालयात लावण्यात आलेल्या सीसीटीव्ही कॅमेरात कैद झाला आहे. नारपोली पोलिस सीसीटीव्हीच्या आधारे तपास करीत आहे. पोलिसांनी मुस्तफा खानला ताब्यात घेऊन चौकशी सुरू केली आहे.