उल्हासनगर : गेल्या अनेक महिन्यांपासून नळांना पिण्याच्या पाण्याचा थेंबही येत नसल्याने संतप्त झालेल्या पॅनल नंबर 3 च्या नागरिकांनी आज दुपारी उल्हासनगर पालिकेवर हंडामोर्चा काढून प्रवेशद्वारावरच "द्या रे द्या, पाणी द्या'ची'हाक दिली.

पॅनल 3 मध्ये शिवसेना भाजपचे प्रत्येकी दोन-दोन नगरसेवक असून बऱ्याच भागातील नळांना पिण्याचे पाणीच येत नाही. याबाबत भाजपच्या नगरसेविका आशा बिऱ्हाड़े, नाना बिऱ्हाड़े सातत्याने पालिकेकडे पाठपुरावा करत होते. मात्र, कोणताही प्रतिसाद मिळत नसल्याने आणि नागरिकांचा घसा कोरडा राहत असल्याने नाना बिऱ्हाडे, शोभा खैरे, तुकाराम सोनवणे, अशोक खैरे, सुनिल सोनवणे, प्रताप सरदार, अनिल पारवानी यांच्या नेतृत्वाखाली महिलांनी पालिकेवर हंडा मोर्चा काढून प्रवेशद्वारावरच पालिकेच्या विरोधात घोषणाबाजी करून द्यारे द्या पाणी द्याची हाक दिली.

शिष्टमंडळाने मुख्यालय उपायुक्त संतोष देहरकर यांची भेट घेतली असता,चार-पाच दिवसांत पाण्याची नवीन लाईन टाकण्याचे काम हाती घेतले जाणार. तोपर्यंत टँकरने पाणीपुरवठा केला जाईल, असे आश्वासन देहरकर यांनी दिल्याची माहिती नाना बिऱ्हाडे यांनी दिली.