डोंबिवली - कल्याण पूर्वेतील कैलासनगर परिसराचे भाजपचे माजी नगरसेवक मनोज राय यांच्या विरोधात कोळसेवाडी पोलीस ठाण्यात गुन्हा दाखल करण्यात आला आहे. लग्नाचे आमिष दाखवून फसवणूक व लैंगिक अत्याचार केल्याचा आरोप एका 40 वर्षीय महिलेने राय यांच्यावर केला असून सदर महिलेच्या तक्रारीवरून पोलिसांनी गुन्हा दाखल करत तपास सुरू केला आहे.

भारतीय जनता पक्षाचे माजी नगरसेवक तथा विकासक मनोज राय हे विकासक देखील आहेत. तक्रारदार 40 वर्षीय महिला ही गृहिणी असून पीडित महिलेने कोळसेवाडी पोलीस ठाण्यात दाखल केलेल्या तक्रारीनुसार सन 2015 ते मे 2022 या कालावधीत भाजपचे माजी नगरसेवक मनोज राय यांनी महिलेस लग्नाचे आमिष दाखवून वेळोवेळी शारीरिक संबंध प्रस्थापित केले. त्यातून त्या चार वेळा गर्भवती राहिल्या.

गर्भवती राहिल्यानंतर राय यांनी त्यांस दमदाटी, शिवीगाळ, मारझोड आणि धमकी देऊन गर्भपात करण्यास जबरदस्तीने भाग पाडले. आपण या प्रकरणी कोठे बोलू नये म्हणून आपणास सतत मारहाण केली जात होती. आता हा सगळा प्रकार असह्य झाल्याने आणि आपणास लग्नाचे आमिष दाखवूनही ते मागील नऊ वर्षाच्या कालावधीत न पाळल्याने आपण ही तक्रार माजी नगरसेवक मनोज राय यांच्या विरूद्ध करत आहोत, असे महिलेने तक्रारीत म्हटले आहे.

कोळसेवाडी पोलीस ठाण्याचे वरिष्ठ पोलीस निरीक्षक राजेंद्र शिरसाट यांनी या तक्रारीची गंभीर दखल घेऊन या प्रकरणाचा तपास सुरू केला आहे.