नवी मुंबई : शहराच्या हद्दीत प्रवेश केल्यापासूनच शहरातील विकासाचे वेगळेपण नजरेला जाणवते, अशा शब्दांत नवी मुंबईच्या प्रगतीचे चीनमधील युवू शहराचे महापौर व्हॅंग जियान यांनी कौतुक केले. नवी मुंबई महापालिकेने राबवलेल्या विविध उपक्रमांमुळे शहराचे भविष्य आणखी उज्ज्वल होईल, अशा शुभेच्छा जियान यांनी दिल्या. महापौर जयवंत सुतार, उपमहापौर मंदाकिनी म्हात्रे आणि महापालिका आयुक्त अण्णासाहेब मिसाळ यांनी चिनी शिष्टमंडळाचे स्वागत केले. 

ही बातमी वाचली का? आता मुंबईच्या समुद्रकिनारी बिनधास्त करा, कोणालाही घाबरायचं कारण नाही..

अण्णासाहेब मिसाळ यांनी सादरीकरणाद्वारे नवी मुंबई महापालिका क्षेत्राची तसेच महापालिकेतर्फे राबविण्यात येत असलेल्या उल्लेखनीय कामांची व प्रकल्पांची माहिती सादर केली. व्हॅंग जियान यांनीही चिनमधील युवू शहर हे जगातील सर्वात मोठे वाणिज्य शहर असल्याची सादरीकरणाद्वारे माहिती दिली. युवू व नवी मुंबई या दोन शहरांमध्ये बरेचसे साम्य असल्याचे सांगत मैत्रीपूर्ण संबंध निर्माण व्हावेत, अशी अपेक्षाही व्हॅंग यांनी व्यक्त केली.

ही बातमी वाचली का? मुंबईतील ‘या’ ठिकाणचं रेल्वे क्रॉसिंग ठरतंय धोक्याचं!

नवी मुंबईचे विविध सुविधांमधील वेगळेपण अधोरेखित करीत नवी मुंबईचा प्रथम नागरिक या नात्याने युवूसारख्या नामांकित शहराच्या महापौरांचे नवी मुंबईत स्वागत करताना आनंद होत असल्याची भावना महापौर जयवंत सुतार यांनी व्यक्त केली. नवी मुंबई महापालिकेच्या मुख्यालय इमारतीची व तेथील व्यवस्थेची प्रशंसा केली. तसेच युवू शहराच्या महापौरांनी त्यांच्या शहरात येण्याचे निमंत्रण नवी मुंबईचे महापौर, आयुक्त यांच्यासह पदाधिकाऱ्यांना दिले. या वेळी युवूच्या महापौरांसह उपस्थित संचालक यांग झोनघॉन्ग व लाऊ झिओडॉन्ग आणि इतर पदाधिकारी व अधिकाऱ्यांचेही नवी मुंबई महापालिकेच्या वतीने स्वागत करण्यात आले.