उल्हासनगर - एका 44 वर्षीय विधवा महिलेची तिच्या प्रियकराने भिंतीवर डोके आपटून खून केल्याची घटना उल्हासनगरातील विठ्ठलवाडी पोलीस ठाण्याच्या हद्दीत घडली. या घटनेनंतर महिलेचा प्रियकर फरार झाला आहे.सुकन्या या 44 वर्षांच्या महिलेच्या पतीचे 7 वर्षापूर्वी निधन झाले. ती सध्या चिंचपाडा परिसरात मुलांसोबत राहत होती. सुकन्याची 25 वर्षांच्या अनिल भातसोडे याच्याशी ओळख झाली होती.

अनिल हा बेरोजगार होता. या ओळखीचे रुपांतर प्रेमसंबंधात झाले. अनिलने सुकन्याला लग्नाचं आश्वासनही दिले होते. अनिल तिच्याकडून पैसेही घ्यायचा. सुकन्याने पैसे न दिल्यास अनिल तिला मारहाण करायचा. मंगळवारी सुकन्या आणि अनिलमध्ये पैशांवरुन वाद झाला. अनिलने सुकन्याला मारहाण करत तिचे डोके भिंतीवर आपटले. यात सुकन्या गंभीर झाली. घटनेनंतर अनिलने तिथून पळ काढला. सुकन्याला स्थानिकांनी खासगी रुग्णालयात नेले. तिथून कळवा येथील सरकारी रुग्णालयात नेत असताना तिचा मृत्यू झाला.

दरम्यान, आरोपी अनिलकडे मोबाईल नसल्याने तो विविध रेल्वे स्टेशनवर प्रवाशांना ‘माझा फोन चोरीला गेलाय’ असे सांगून त्यांच्या फोनवरून भावाला फोन करत आहे. वरिष्ठ पोलीस निरीक्षक संजय गायकवाड यांच्या मार्गदर्शनाखाली गुन्हे डिटेक्शनचे उपनिरीक्षक हर्षल राजपूत,हवालदार रामदास मिसाळ,सुजित निचिते यांची टीम अनिलच्या मागावर आहेत.