कल्याण : कर्णिक रोड येथील छत्रपती शिक्षण मंडळाच्या प्राथमिक विद्या मंदिरतर्फे बापसई येथील आदिवासी पाड्यांवर दिवाळी साजरी करण्यात आली. शाळेतर्फे गेल्या 9 वर्षांपासून शाळेतील विद्यार्थी, शिक्षक व पालक सामाजिक बांधिलकीतून हा उपक्रम राबवत आहेत.

धान्य, पणत्या व मिठाईचे वाटप या वेळी करण्यात आले. पणत्या व मुलांनी तयार केलेले आकाशकंदील लावून आदिवासी मुलांच्या चेहऱ्यावर एकच आनंद पाहायला मिळाला. या उपक्रमासाठी डॉ. वसुधा पवार व चिन्मय मिशन यांचे सहकार्य लाभले. शाळेच्या मुख्याध्यापिका भारती वेदपाठक यांनीही या उपक्रमात सहभाग घेतला.

विद्यार्थी व पालकांचे सामाजिक कर्तव्य व जाणीव जागृती या उपक्रमाच्या माध्यमातून रुजविण्याचा प्रयत्न शाळा करते. जल, जंगल, जीवन या आदिवासींच्या हक्कासाठी झगडणारा आमच्या शाळेचा विद्यार्थी विशाल जाधव याच्या माध्यमातून आम्ही हा कार्यक्रम केल्याचे या वेळी शिक्षकांनी सांगितले.