वाशी - मागील काही दिवसांपासून नवी मुंबईतील अंड्यांची ६.०३ एक नग एवढ्यावर पोहोचली आहे. पण, ही किंमत गेल्यावर्षीच्या तुलनेत जास्त नाही. अंड्यांच्या किंमतीत गेल्या काही महिन्यांपासून वाढ होताना दिसत आहे. कोंबड्यांना दिल्या जाणाऱ्या खाद्याच्या किमती वाढल्यामुळे अंड्यांची किंमत वाढल्याचे निरीक्षण व्यापारी व्यक्त करत आहेत.

कुकुट खाद्याच्या किंमती या गेल्या काही महिन्यांपासून १० टक्क्यांनी वाढल्या असल्यामुळे नवी मुंबईतील अंड्यांच्या किमतीत वाढ झालेली दिसून येत आहे.

अंड्यांची किंमत वाढण्यामागे कुकुट खाद्य, मजुरी, वाहतूक, इ. गोष्टी कारणीभूत असून नवी मुंबईतील नागरिकांना अंड्यांच्या एका ट्रे साठी सरासरी १८० रुपये मोजावे लागत आहेत. ज्याची पूर्वीची किंमत ही सरासरी १६० रुपये इतकी होती. बहुतेक कुटुंबांमध्ये रोजच्या आहारात अंड्यांचे सेवन केले जाते.

विशेषतः अंड्यामध्ये कॅल्शियमची मात्रा जास्त असल्यामुळे तरुणांना आणि कॅल्शियमची कमतरता असणाऱ्यांना अंडी खाण्याचा सल्लाही दिला जातो. मात्र अंड्यांच्या किमती वाढल्यामुळे बऱ्याच ग्राहकांकडून जेवणातून अंडी कमी करण्याचे प्रमाण वाढताना दिसत आहे. परंतु आजचे दर लक्षात घेता अंडी खाणाऱ्यांसाठी चांगली बातमी असून अंड्यांचे दर काहीसे कमी झालेले दिसून येत आहेत.

नवी मुंबईत मागील काही दिवसांपासून अंड्यांच्या किमतीत घसरण पाहायला मिळते आहे. ८ जानेवारी रोजी अंड्यांच्या एका ट्रे साठी दुकानदारांना १८६ रुपये मोजावे लागत होते परंतु सध्याच्या स्थितीला (१७ जानेवारी) अंड्यांचा दर हा ५.८ रुपये एक नग इतका आहे. म्हणजेच एका ट्रे ला १७४ रुपये इतकी किंमत मोजावी लागते आहे.

कोंबड्यांचे खाद्य महागले व महागाईमुळे आर्थिक नुकसान

गेल्या आर्थिक वर्षात कुकुटपालकांना मोठ्या तोट्याचा सामना करावा लागला आहे. उत्पादन खर्चापेक्षा कमी दर मिळाल्यामुळे वर्षभर कुकुट पालनाचे नुकसान पहायला मिळाले. त्यामुळे अंडी देणाऱ्या कोंबड्यांची संख्या घटली. शिवाय कुकुट खाद्यात ५०% हुन अधिक मक्याचा वापर केला जातो.

मात्र, मक्याच्या किमतीत २५% ने वाढ झालेली असून मक्याची किंमत प्रति किलो २५ रुपयांवर गेली आहे. त्याचा थेट परिणाम कुकुट खाद्यावर झाल्यामुळे एकंदरीत कोंबड्या आणि अंड्यांच्या उत्पादनावर त्याचा परिणाम दिसून येतो आहे.

अंडी विक्रेते आणि पोल्ट्री चालकांची प्रतिक्रिया

'अंड्यांचे दर नजीकच्या काळात कमी होतीलच अशी शाश्वती देता येत नाही. पण, कोंबड्यांना लागणाऱ्या खाद्याचे दर आटोक्यात आणले तर याचा सकारात्मक परिणाम अंड्यांच्या किमतीवर व उत्पादनावर दिसून येईल.'

- पी.सी. अंथोनी, अंडी विक्रेते

'कुकुट खाद्याच्या किमती वाढल्याने आम्हाला अंड्यांच्या उत्पादनात तोटा सहन करावा लागतो आहे. त्यात मजुरी आणि वाहतुकीचा खर्चही उत्पादनाच्या प्रमाणात जास्त आहे. त्यामुळे अंड्यांची किंमत ही कमी-जास्त होतच राहणार. परंतु गेल्यावर्षीपेक्षा या महिन्यात अंड्यांची किंमत वाढलेली जरी असली तरीही अजून तरी दर आटोक्यात आहेत असे म्हणावे लागेल.'

- अब्बास शेख, पोल्ट्री चालक