नवी मुंबई : भूतबाधा घालविण्यासाठी पूजापाठ व होमहवन करण्याच्या बहाण्याने एका बोगस मांत्रिकाने खारघरमध्ये राहणाऱ्या ३२ वर्षीय तरुणीवर सहा महिने लैंगिक अत्याचार केल्याचा धक्कादायक प्रकार उघडकीस आला आहे. सुशीलकुमार रमेशचंद्र चौहान (४३) असे या बोगस मांत्रिकाचे नाव असून, पीडित तरुणीवर लैंगिक अत्याचार करून हा बोगस मांत्रिक फरार झाला होता. मात्र, अनैतिक मानवी वाहतूक प्रतिबंधक कक्षाच्या विशेष पथकाने त्याला हरिद्वार येथून अटक केली. 

ही ३२ वर्षीय पीडित तरुणी खारघरमध्ये आईसह राहण्यास आहे. गत नोव्हेंबर महिन्यामध्ये पीडित तरुणीच्या वागणुकीत फरक पडल्याने तिच्यावरील उपचारासाठी उत्तर प्रदेशातून सुशीलकुमार चौहान या मांत्रिकाला घरी बोलावून घेतले होते. या मांत्रिकाने तरुणीला भूतबाधा झाल्याचे सांगून तिची भूतबाधा घालविण्यासाठी होमहवन व पूजापाठ करावा लागेल, असे सदर तरुणीच्या आईला सांगितले होते. त्यानुसार तीन-चार वेळेस या मांत्रिकाने होमहवन व पूजापाठ करण्याचा बहाणा केला; मात्र त्यानंतर त्याने संधी साधून या तरुणीला गुंगी येणारे द्रव्य देऊन तिच्यावर लैंगिक अत्याचार केले. त्यातच या बोगस मांत्रिकाच्या लैंगिक अत्याचारात वाढ होऊ लागल्याने या तरुणीने मागील आठवड्यात खारघर पोलिस ठाण्यात गुन्हा दाखल केला होता. गुन्हा दाखल झाल्यानंतर हा बोगस मांत्रिक फरार झाला होता. नवी मुंबई पोलिसांच्या विशेष पथकाने त्याला हरिद्वार येथून अटक केली. न्यायालयाने त्याची चार दिवसांच्या पोलिस कोठडीत रवानगी केली आहे.