नालासोपारा : वसई-विरार, नालासोपाऱ्यात शनिवारी (ता.१४) रात्रीपासून पावसाने अक्षरशः थैमान घातले होते. त्यामुळे मध्यरात्रीपासूनच नालासोपारा पूर्व-पश्‍चिम परिसरातील मुख्य रस्ते जलमय झाले.

सकाळच्या वेळेत घराबाहेर पडणाऱ्या नागरिकांची चांगलीच दैना उडाली होती. त्यांना गुडघाभर पाण्यातून मार्ग काढताना कसरत करावी लागली. पावसामुळे वारंवार याठिकाणी पाणी भरत असल्याने नागरिकांनी मात्र तीव्र संताप व्यक्त केला.

नालासोपारा पूर्व सेन्ट्रलपार्क, ओसवाल नगरी, तुळिंज आचोळे, संतोष भुवन, बिलालपाडा, धणीवबाग हे रस्ते पाण्याखाली गेले होते. नालासोपारा स्थानक परिसर आणि मुख्य रस्त्यावर गुडघाभर पाणी साचले होते. या पाण्यातून मार्ग काढताना वयोवृद्ध नागरिक, महिला, पुरुष यांची मोठी गैरसोय झाली.

काही ज्येष्ठ नागरिक तर या साचलेल्या पाण्यात पाय घसरून पडल्याच्या घटनादेखील घडल्या. नालासोपारा पश्‍चिम बसस्थानक, स्टेशन रोड, निलेमोरे गाव, सिविक सेंटर याठिकाणीही हीच अवस्था होती. 

पाण्यातून मार्ग काढताना रिक्षा, चार चाकी, दोन चाकी वाहन बंद पडल्याने त्यांना आपली वाहने ढकलत एक ते दोन किलोमीटरपर्यंत पायपीट करावी लागली. थोडा जरी पाऊस पडला, तरी नालासोपारा जलमय होत असल्याने नागरिकांनी महापालिका प्रशासनाविरोधात संताप व्यक्त केला.