ठाणे : वागळे इस्टेट परिसरात ठाणे पोलिसांनी सापळा रचून २ लाख ८३ हजाराच्या ५०० रुपये किमतीच्या नकली नोटांसह काळूराम बुद्धा इंदवाळे (कसारा, ता. शहापूर) याला अटक केली होती. ठाणे गुन्हे शाखा युनिट पाचकडून सुरू असलेल्या तपासात या बनावट नोटांचे इगतपुरी कनेक्‍शन उघड झाले आहे.

पोलिसांनी नोटा बनवण्यासाठी लागणारी सामुग्री हस्तगत केली आहे. ठाणे न्यायालयाने आरोपी इंदवाळे याला १९ ऑगस्टपर्यंत पोलिस कोठडी सुनावली आहे. यातील फरारी आरोपी कांतिलाल मोकाशी याचा पोलिस शोध घेत आहेत.

चलनातील पाचशे रुपयांच्या ५६६ बनावट नोटा विक्री करण्यासाठी आलेल्या काळूराम इंदवाळे (४०) याला वागळे इस्टेट गुन्हे शाखा युनिटने गेल्या सोमवारी तीन हात नाका येथील आरटीओ कार्यालयाजवळून अटक केली होती.

हे भामटे दीड लाखात तीन लाखांच्या बनावट नोटा देत असत. त्यानुसार गुन्हे शाखेचे वरिष्ठ पोलिस निरीक्षक जयराज रणवरे यांनी सखोल तपास करून फरारी आरोपी मोकाशी याच्या इगतपुरी येथील घरात छापा मारून नोटा बनवण्यासाठी लागणारी सामुग्री हस्तगत केली.