मुंबई - मुंबईत अनधिकृत बांधकामे फोफावली असून, महापालिकेकडे तक्रारींचा ओघ वाढला आहे. गेल्या तीन वर्षांत महापालिकेकडे ९४ हजार ८९१ तक्रारी आल्या; त्यापैकी पाच हजार तक्रारींची दखल घेण्यात आली, अशी माहिती प्रशासनाने दिली.

माहिती अधिकार कार्यकर्ते शकील अहमद यांनी अवैध बांधकामांवर तत्काळ कारवाई करण्याची मागणी मुख्यमंत्री देवेंद्र फडणवीस आणि महापालिका आयुक्त प्रवीण परदेशी यांच्याकडे केली आहे. बेकायदा बांधकामांवरील कारवाईसाठी महापालिका दर वर्षी कोट्यवधी रुपये खर्च करते. परंतु, अनधिकृत बांधकामे ‘जैसे थे’ आहेत. एक मार्च २०१६ ते आठ जुलै २०१९ दरम्यान ९४ हजार ८५१ ऑनलाइन तक्रारींची नोंद झाली. त्यापैकी केवळ ३२३ बांधकामे पाडल्याची माहिती प्रशासनाने दिली. 

दर वर्षी १५ हजारांपेक्षा अधिक अनधिकृत बांधकामांना महापालिका नोटिसा बजावते. त्यापैकी फक्त १० ते २० टक्के बांधकामांवर कारवाई होते.