मुंबई - शिवशक्ती-भीमशक्ती ऐक्‍याची हाक देत राष्ट्रीय लोकशाही आघाडीसोबत गेलेले रिपब्लिकन पक्षाचे नेते रामदास आठवले यांची झोळी अद्याप रिकामीच आहे. त्यांनी मागणी केलेल्या मुंबईतील दोन्ही लोकसभा जागांवर शिवसेना आणि भाजपच्या विद्यमान खासदारांनी प्रचार सुरू केला आहे. शिवसेना-भाजप यांनी एकत्र प्रचाराच्या तारखाही ठरवल्या आहेत.

रामदास आठवले यांनी सुरवातीला शिवसेनेचे खासदार राहुल शेवाळे यांचा दक्षिण मध्य मुंबई मतदारसंघाची मागणी केली होती. शिवसेनेकडून प्रतिसाद न मिळाल्यामुळे त्यांनी दक्षिण मध्य मुंबई किंवा भाजपच्या ईशान्य मुंबई या मतदारसंघांचा पर्याय दिला; परंतु शिवसेना आणि भाजपने त्यांना कोणताही प्रतिसाद दिला नाही. शेवाळे आणि ईशान्य मुंबईतील भाजपचे खासदार किरीट सोमय्या यांना प्रचार सुरू केला आहे. पक्षांकडून सूचना मिळाल्याखेरीज या दोन्ही खासदारांना प्रचार सुरू करता आला नसता. त्यामुळे या दोन्हींपैकी एकही जागा आठवले यांना मिळणे कठीण मानले जाते.