मुंबई : शिवसेनेतून बंडखोरी केलेल्या आमदारांना आमदारकी वाचवायची असेल तर त्यांना कोणत्याही पक्षात जाता येईल. मनसेमध्ये बंडखोर आमदार गेल्याने त्या पक्षाचे अध्यक्ष राज ठाकरेंना मुख्यमंत्रिपद मिळणार असेल तर ती ऐतिहासिक घटना असेल, अशी प्रतिक्रिया शिवसेना नेते संजय राऊत यांनी व्यक्त केली आहे. शिवसेनेच्या नावावर राजकारण करणाऱ्या शिंदे गटाला ठाकरे नाव आणि हिंदुत्व दोन्ही सोडायचे नाही.

अशा परिस्थितीत एकनाथ शिंदे गटातील आमदार राज ठाकरेंच्या मनसेत प्रवेश करू शकतात, अशी चर्चा जोर धरू लागली आहे. कारण एकनाथ शिंदे यांनी मनसे अध्यक्ष राज ठाकरे यांच्याशी दूरध्वनीवरुन चर्चा केल्याची माहिती समोर आली आहे. संजय राऊत यांनी यावर प्रतिक्रिया दिली आहे. बंडखोर आमदार एमआयएम, समाजवादी पक्षातही जाऊ शकतात. बंडखोरांमुळे मनसेला पर्यायाने राज ठाकरे यांना मुख्यमंत्रिपद मिळणार असेल तर ती ऐतिहासिक गोष्ट असेल, अशी प्रतिक्रिया संजय राऊत यांनी व्यक्त केली.