डोंबिवली - कल्याण डोंबिवली महानगरपालिकेतील रुक्मिणीबाई रुग्णालयातील वैद्यकीय अधिकारी डाॅ. तृणाली महातेकर यांना पालिका प्रशासनाने निलंबित केले आहे. काही महिन्यांपूर्वी सदर रुग्णालयात प्रसूतीसाठी आलेल्या एका फिरस्ता गरोदर महिलेला उपचारासाठी दाखल करून न घेता तिला अन्यत्र जाण्याची सूचना डॉ. महातेकर व अन्य कर्मचाऱ्यांनी दिली होती.
याप्रकरणी चौकशी समितीने डॉ. महातेकर यांनी निष्काळजीपणाचा दाखविल्याचा ठपका ठेवला होता. अखेर पालिका प्रशासनाने याप्रकरणी कारवाई केली आहे. कल्याण येथील स्कायवॉक वर एका फिरस्ता महिलेला प्रसूती कळा सुरू झाल्याने महात्मा फुले चौक पोलीस ठाण्याचे पोलीस व काही महिलांनी सदर महिलेला उपचारासाठी कल्याण डोंबिवली महानगरपालिकेच्या रुक्मिणीबाई रुग्णालयात उपचारासाठी आणले होते.
मात्र या महिलेला रुग्णालयाच्या प्रवेशव्दारावर रुग्णालयातील अधिकारी, कर्मचाऱ्यांनी रोखून ठेवले होते. याठिकाणी पुरेसा कर्मचारी वर्ग नाही. तुम्ही या महिलेला प्रसूतीसाठी अन्य रुग्णालयात घेऊन जा, असे कर्मचारी सांगत होते.
या महिलेला तात्पुरते दाखल करून पहिले उपचार सुरू करा, अशी मागणी पोलीस करत होते. रुग्णालयात त्यावेळी कार्यरत असलेल्या वैद्यकीय अधिकारी डाॅ. महातेकर आणि इतर कर्मचाऱ्यांनी फिरस्ती महिलेला दाखल करून घेण्यास टाळाटाळ केली. दरम्यान सदर महिला ही रुक्मिणीबाई रुग्णालयाच्या प्रवेशव्दारावरच प्रसूत झाली होती. सप्टेंबर महिन्यात ही घटना घडली होती.
प्रसूती कळा सुरू असलेल्या एका महिलेला दाखल करून घेण्यास पालिका रुग्णालयाने टाळाटाळा केल्याने सर्व स्तरातून पालिका अधिकाऱ्यांवर टीका झाली होती. पालिकेने सुरवातीला सदर महिलेला वसंत व्हॅली येथे जाण्यासाठी रुग्णवाहिकेची सोय करण्यात आली होती. तसेच ती प्रसूत झाल्यानंतर तिला योग्य उपचार देण्यात आले होते असे सांगत या प्रकरणाची चौकशी केली जाईल असे सांगितले होते.
आमदार डाॅ. जितेंद्र आव्हाड, आमदार राजू पाटील यांनी ही या प्रकरणाच्या चौकशीची मागणी केली होती. पालिकेने अतिरिक्त आयुक्त मंगेश चितळे यांच्या मार्गदर्शनाखाली एक चौकशी समिती स्थापन केली होती. या समितीने या प्रकरणात घटना घडली त्यावेळी तेथे उपस्थित असलेल्या डाॅ. महातेकर यांच्यावर निष्काळजीपणाचा ठपका ठेवला होता.
चौकशी समितीने दिलेल्या निष्कर्षवर पालिका प्रशासनाने डॉ. महातेकर यांच्यावर निलंबिणाची कारवाई केली आहे. निलंबन काळात डाॅ. महातेकर यांना दररोज पालिका मुख्यालयात हजेरी लावण्याचे आदेश देण्यात आले आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.