मुंबई : मनसेचे माजी आमदार आणि राज ठाकरे यांचे व्यावसायिक भागीदार नितीन सरदेसाई 'ईडी' कडून चौकशी करण्यात येत आहे. सरदेसाई हे आज सकाळीच चौकशीसाठी ईडी कार्यालयात पोहोचले आहेत. कोहिनूर मिल व्यवहार प्रकरणात ही चौकशी सुरू असल्याचे समजते आहे.

कोहिनूर मिल खरेदी-विक्री प्रकरणी मनसे प्रमुख राज ठाकरे यांची 'ईडी'ने साडेआठ तास कसून चौकशी केली. यानंतर आता मनसेचे नेते आणि माजी आमदार नितीन सरदेसाई यांची चौकशी सुरू आहे. सरदेसाई हे देखील कोहिनूर मिल व्यवहारातील भागीदार होते. त्यामुळे त्यांची चौकशी करण्यात येत आहे.

विधानसभा निवडणुका जवळ आहेत. अशातच कोहिनूर प्रकरणाची चौकशी 'ईडी'ने सुरू केली आहे. मनसेचे राज ठाकरे, शिवसेनेचे ज्येष्ठ नेते, माजी मुख्यमंत्री मनोहर जोशी यांचा मुलगा उन्मेष जोशी यांच्यानंतर आता मनसेचे नेते नितीन सरदेसाई यांची चौकशी करण्यात येत आहे. विधानसभा निवडणुकीच्या तोंडावर शिवसेना आणि मनसेवर दबाव निर्माण करण्यासाठी ही चौकशी सुरू असल्याचं बोललं जात आहे.