मुंबई - महावितरणच्या दिव्यांग कर्मऱ्यांनी सोमवार (ता.२३) पासून आझाद मैदानात बेमुदत उपोषणाची हाक दिली होती. मात्र आंदोलनाच्या दुसऱ्या दिवशीच दिव्यांग कल्याण विभागाचे सचिव यांच्यासोबत सकारत्मक चर्चा झाल्याने हे आंदोलन तात्पुरते स्थगित करण्यात आले असल्याची माहिती महावितरणच्या आंदोलनात सहभागी कर्मचाऱ्यांनी दिली.

दरम्यान, प्रहार संघटनेच्या माध्यमातून महावितरणसह इतर सरकारी आणि निमसरकारी कार्यालयात काम करणाऱ्या दिव्यांग कर्मचाऱ्यांनी विविध मागण्यासाठी आझाद मैदानात राज्यव्यापी बेमुदत उपोषणाची हाक दिली. यामध्ये बीएमसी, कृषी/अकृषिक विद्यापीठे यांसह महावितरण, महापारेषणमधील कर्मचारी आणि अधिकारी सहभागी झाले. २०० हुन अधिक कर्मचारी यामध्ये सहभागी झाले होते.

महावितरण आणि महापारेषांच्या कर्मचाऱ्यांची मागणी प्रामुख्याने प्रलंबित दिव्यांग वाहतूक भत्ता व सहायक तंत्रज्ञान प्रकरणे मार्गी लावणे ही ठेवण्यात आली होती. मंत्रालयातील बैठकीनंतर माहिती देताना महावितरण कर्मचारी अमित मिश्रा म्हणाले, सोमवार पासून आम्ही आझाद मैदानात आंदोलन करत आहोत. आज मंत्रालयात दिव्यांग कल्याण विभागाचे सचिव महाजन यांनी संघटना प्रतिनिधीसह आम्हाला भेटीसाठी बोलावले. या भेटीत पुढील २ महिन्यात संघटनेच्या मागण्या पूर्ण करण्यात येईल असे आश्वासन दिले. त्यामुळे संघटनेने उपोषणास तात्पुरती स्थगिती दिली आहे.