मुंबई - धुरक्‍याच्या प्रभावाने मुंबईसह नवी मुंबईची हवा सलग दुसऱ्या दिवशी रविवारी खराब दिसून आली. आज धुरक्‍याच्या प्रभावामुळे मुंबतील हवेचा दर्जा शनिवारपेक्षाही जास्त खालावला होता. उद्या (सोमवारी) देखील मुंबई व नजीकच्या भागात धुरक्‍याचा प्रभाव कायम राहील, असा अंदाज मुंबई प्रादेशिक हवामान खात्याने वर्तवला आहे. 

नवी मुंबईतील हवेचा दर्जा आज अत्यंत वाईट या वर्गवारीत होता. शनिवारी नवी मुंबईतील सूक्ष्म धूलिकणांचे प्रमाण तीनशे एकोणपन्नासवर होते. नवी मुंबईत खालावलेल्या हवेच्या दर्जाने थेट दिल्लीतील हवेच्या प्रदूषणाची मर्यादा गाठली. नवी दिल्लीतील धीरपूर, पुसा, नोएडा, दिल्ली विमानतळ या स्थानकांपेक्षाही नवी मुंबईतील सूक्ष्म धूलिकणांचे प्रमाण जास्त दिसून आले. वाढलेली आर्द्रता आणि हवेचा वेग मंदावल्याने मुंबईत धूर आणि धुके यांच्या मिश्रणातून हवेचा दर्जा ढासळलेला आहे. 

ओखी चक्रीवादळाचा जोर ओसरल्यानंतर सर्दी व खोकल्याचे रुग्ण मुंबईभर वाढले असल्याची माहिती डॉक्‍टरांकडून मिळत आहे. आता धुरक्‍याच्या प्रभावामुळे दमेकरी रुग्णही आता दवाखान्यांबाहेर रांगा लावतील, अशी भीती कान, नाक व घसातज्ज्ञांनी व्यक्त केली. "मुंबई सफर' या प्रकल्पांतर्गत मुंबईतील विविध स्थानकांच्या हवेच्या प्रदूषणाची माहिती दिली जाते. गेल्या दोन दिवसांपासू मुंबई, नवी मुंबईतील स्थानकांतील घसरत्या हवेच्या दर्जाबद्दल "मुंबई सफर'च्या अधिकाऱ्यांनी चिंता व्यक्त केली.