मुंबई - महापालिका, नगरपालिका व अन्य स्थानिक स्वराज्य संस्थांना आता आपल्या कार्यक्षेत्रातील हॉटेलमध्ये ध्रूम्रपान रोखण्यासाठी प्रयत्न करावे लागणार आहेत. ज्या हॉटेलमध्ये बेकायदा धूम्रपान होत असेल तर त्यांचे परवाने रद्द केले जाऊ शकतात. तशा आशयाचे आदेश जारी करण्याबाबत नगरविकास राज्यमंत्री डॉ. रणजित पाटील यांनी या खात्याच्या प्रधान सचिव मनीषा म्हैसकर यांना लेखी सूचना केली आहे.

तंबाखू, सिगारेट, गुटखा असे कोणतेही धूम्रपान करण्यासाठी हॉटेलमध्ये "स्पेशल झोन' तयार करावे लागतात. त्यासाठी स्पेशल झोनची महापालिकेकडून परवानगी घ्यावी लागते. पण परवानगी न घेताच धूम्रपान केल्याचा प्रकार मुंबईतील पाच हॉटेलमध्ये आढळून आले. त्यानंतर महापालिकेने या हॉटेलवर कारवाई केली. त्याबाबतचे वृत्त "सकाळ'ने प्रसिद्ध केले होते. या वृत्ताची दखल घेत राज्यमंत्री पाटील यांनी आदेश जारी केले आहेत. मुंबई महापालिकेने हॉटेलवर केलेल्या कारवाईच्या धर्तीवर राज्यातील महापालिका व स्थानिक स्वराज्य संस्थांमध्ये अंमलबजावणी करावी, अशी सूचना पाटील यांनी केली आहे.