मुंबई : कर्जवसुली करण्यासाठी धमकावल्याचा आरोप असलेल्या मुथुट होम फायनान्स इंडिया लिमिटेडच्या संचालकांसह पुणे पोलिसांना नोटीस बजावण्याचे आदेश गुरुवारी (ता. 21) मुंबई उच्च न्यायालयाने दिले. या आरोपांबाबत खुलासा करण्याचे निर्देशही खंडपीठाने दिले आहेत.

पुण्यातील व्यावसायिक प्रभाकर कोतवाल यांनी उच्च न्यायालयात ऍड्‌. आनंद जोंधळे यांच्यामार्फत मुथुट होम फायनान्स कंपनीच्या विरोधात याचिका केली आहे. या याचिकेवर गुरुवारी न्या. भूषण धर्माधिकारी आणि न्या. साधना जाधव यांच्या खंडपीठापुढे सुनावणी झाली. याचिकादाराने डिसेंबर 2016 मध्ये या कंपनीकडून 14 टक्के व्याजदराने 14 लाख 86 हजार रुपयांचे गृहकर्ज 240 महिन्यांसाठी घेतले होते. या कर्जाचे नियमित हप्ते त्यांच्या बॅंक खात्यातून कंपनीकडे जात होते. 

कोतवाल यांच्या ग्राहकांकडून त्यांच्या बॅंक खात्यात पैसे जमा झाल्यावर ती रक्कम मुथुट कंपनीला मिळत असे. सप्टेंबरमध्ये त्यांच्या ग्राहकांकडून बॅंकेत वेळेत रक्कम जमा झाली नाही. त्यामुळे त्यांना कर्जाचा हप्ता भरता आला नाही. याबाबत त्यांना दुसऱ्याच दिवशी कंपनीतून एका महिलेचा दूरध्वनी आला. तिने त्यांना हप्ता भरण्यास सांगताना औद्धत्यपूर्ण भाषा वापरली आणि आक्षेपार्ह विधानेही केली. 

या घटनेमुळे हबकलेल्या याचिकादाराने वाकडेवाडी पोलिस ठाणे आणि भारती विद्यापीठ पोलिस ठाण्यात तक्रार दाखल करण्याचा प्रयत्न केला. परंतु, पोलिसांनी दखल न घेतल्यामुळे त्यांनी उच्च न्यायालयात याचिका केली. न्यायालयाने पोलिस संरक्षण द्यावे आणि आपल्याला झालेल्या मनस्तापाबद्दल संबंधित कंपनीकडून नुकसान भरपाई मिळवून द्यावी, अशी मागणी त्यांनी केली आहे.