मुंबई : ऑर्डिनन्सचे खासगीकरण करण्याचा केंद्र सरकारकडून सध्या प्रयत्न सुरू आहे. त्याच्या निषेधार्थ मंगळवारपासून सुरू असलेला (ऑर्डिनन्स) आयुध निर्माणी कामगारांचा संप शुक्रवारी सलग चौथ्या दिवशीही सुरूच होता.

देशभरातील 41 ऑर्डिनन्समध्ये मंगळवार (ता. 20) पासून हा संप सुरू असून अंबरनाथमधील ओएफ आणि एमटीपीफमधील सुमारे तीन हजार कामगारदेखील या संपात सहभागी झाले आहेत. ऑर्डिनन्समध्ये भारताच्या संरक्षण दलासाठी लागणारी लष्करी सामग्री व वाहने, शस्त्रास्त्रे यांची निर्मिती केली जाते.

अंबरनाथ येथे संपाच्या चौथ्या दिवशी बहुतेक राजकीय पक्षांच्या लोकप्रतिनिधींनी कामगारांना पाठिंबा दर्शवला. केवळ कंपनीचे वरिष्ठ अधिकारी पोलिस बंदोबस्तात कंपनीमध्ये जातात आणि सायंकाळी पुन्हा कंपनीबाहेर येतात. कामगार संघटनांचे प्रतिनिधी सकाळी लवकर कंपनीच्या गेटवर जमा होत असून रात्री उशिरा घरी जात असल्याचे कामगार संघटनेचे प्रतिनिधी दिनेश कंटे यांनी सांगितले.