मुंबई - चित्रपट व टीव्ही अभिनेत्री पल्लवी जोशी यांची सायबर फसवणूक झाल्याचा प्रकार उजेडात आला आहे. त्यांच्या आंतरराष्ट्रीय क्रेडिट कार्डचा डाटा चोरून आरोपींनी युरोपात त्याचा वापर केल्याचे निष्पन्न झाले आहे. याप्रकरणी वर्सोवा पोलिस अधिक तपास करत आहेत. 

अंधेरी सात बंगला परिसरात राहणाऱ्या जोशी यांच्या क्रेडिट कार्डाचा वापर परदेशात करण्यात आला असून त्या वेळी कार्ड जोशी यांच्याकडेच होते. नेहमीप्रमाणे त्या कार्यालयात बसल्या असताना त्यांच्या मोबाईलवर पाच ते सहा संदेश आले. त्यात क्रेडिट कार्डमधील व्यवहार युरोमध्ये (युरोपियन चलन) झाले होते. त्या वेळी त्यांनी तत्काळ बॅंकेला याची माहिती देऊन क्रेडिट कार्ड ब्लॉक करण्यास सांगितले, पण तोपर्यंत जोशी यांच्या क्रेडिट कार्डवरून 12 हजार रुपयांचे ऑनलाईन व्यवहार झाले होते. याप्रकरणी प्राथमिक तपासानुसार, आरोपींनी क्रेडिट कार्डचा वापर करून युरोपमध्ये उबर प्रवासाचा खर्च भरला असल्याचे निष्पन्न झाले आहे. 

बॅंकांची स्वतःची दक्षता यंत्रणा असते. त्यात ग्राहकांच्या खात्यातून संशयित व्यवहार झाल्यानंतर बॅंकेच्या वतीने संबंधित ग्राहकाला तत्काळ विचारणा केली जाते. त्यामुळे मोठ्या फसवणुकीला वेळीच आळा घातला येतो; मात्र या प्रकरणामध्ये असे झाले नाही. याबाबत तक्रारदार अभिनेत्रीला विचारले असता त्यांना असा कोणताही संदेश अथवा दूरध्वनी बॅंकेकडून आला नाही. त्यांनी स्वतः दूरध्वनी करून बॅंकेला याबाबतची माहिती दिली, असे पोलिस अधिकाऱ्याने सांगितले. 

आंतरराष्ट्रीय टोळीचा हात? 
या प्रकरणामागे आंतरराष्ट्रीय सराईत सायबर आरोपींचा सहभाग असल्याचा संशय आहे. हा व्यवहार कोणी केला व त्याचा फायदा कोणाला झाला या व्यवहारांबाबतची माहिती बॅंकेकडे मागितली असून ती मिळाल्यानंतर नेमकी माहिती देता येईल, असे अधिकाऱ्याने सांगितले. 

कोणती काळजी घ्याल? 
- कार्डचा पिन क्रमांक अथवा ओटीपी कोणालाही सांगू नका 
- क्रेडिट अथवा डेबिट कार्ड वापरत असताना स्वतः पिन क्रमांक टाका 
-ऑनलाईन व्यवहार करताना सावधानता बाळगा 
-संशयित व्यवहार झाल्यास तत्काळ बॅंकेला कळवून कार्ड ब्लॉक करा