PM Narendra Modi पंतप्रधान नरेंद्र मोदी यांचे खारघरमध्ये आगमन होणार असल्याने महापालिका आणि सिडको महामंडळ कामाला लागले आहे. शहरातील रस्ते, पदपथ स्वच्छ करण्यासाठी प्रशासनाची लगबग सुरु झाली असून पदपथांवरील झाडी-झुडपे गायब झाली असून रंगरंगोटीमुळे खारघर चकाचक झाल्याचे चित्र आहे.

पंतप्रधान नरेंद्र मोदी यांच्याहस्ते ‘नमो महिला सशक्तीकरण’ या अभियानाचा शुभारंभ होणार आहे. खारघर सेक्टर ३३ येथील सेंट्रल पार्कच्या मैदानावर पुढील आठवड्यात या अभियानाचा महासोहळा होणार आहे. याकरिता खारघरच्या प्रवेशद्वारापासून ते मैदानाच्या दिशेने जाणाऱ्या रस्त्यांवर महापालिका प्रशासनातर्फे सर्व विकासकामांना वेग आला आहे.

दोन दिवस गोल्फकोर्स येथे नवी मुंबई पोलिस, कोकण विभागीय आयुक्त, रायगड जिल्हाधिकारी, सिडको, नवी मुंबई आणि पनवेल महापालिकेच्या अधिकाऱ्यांच्या देखरेखीत विकासकामांना वेग आला आहे.

खारघरमधील सेंट्रलपार्क मैदानापासून रस्त्यांमधील दुभाजकांच्या रंगरंगोटी केली जात आहे. तर दुर्दशा झालेल्या खारघरमध्ये रस्त्यांची देखील दुरुस्ती केली जात असल्याने पंतप्रधानांच्या आगमनामुळे रस्ते गुळगुळीत झाले आहेत. त्यामुळे दोन दिवसांमध्ये खारघर परिसराचा चेहरामोहरा बदलेला असल्याने पनवेल महापालिकेची संपूर्ण यंत्रणा कार्यान्वित झाली आहे.

व्हिआयपींमुळे यंत्रणा अलर्टवर

पावसाळ्यात खारघर नोडच्या रस्त्यांची चाळण झाली आहे. खारघरचे रस्ते सिडकोने महापालिकेला हस्तांतर केल्यामुळे आणि महापालिकेचे रस्त्यांची निविदा प्रक्रियेत असल्याने या रस्त्यांच्या देखभाल दुरुस्तीकडे कंत्राटदारांनी दुर्लक्ष केले आहे. गेल्या वर्षीही हे रस्ते सिडकोकडे असताना त्यांची अवस्था वाईट झाली होती. परंतु, याचदरम्यान केंद्रीय मंत्री अमित शहा यांचे ज्येष्ठ निरूपणकार आप्पासाहेब धर्माधिकारी यांच्या सत्कार सोहळ्याकरीता खारघरमध्ये आगमन होणार असल्याने तेव्हा रस्त्यांच्या दुरुस्तीसाठी सर्व यंत्रणा कामाला लागली होती. तर यंदा पंतप्रधानांचे निमित्त चालून आल्याने पावसाळ्यानंतर केंद्रीय मंत्र्यांच्या आगमनाची इच्छा खारघरवासी व्यक्त करत आहेत.