अलिबाग : 14 डिसेंबर 2019 ते 31 मार्च 2020 या कालावधीत मुदत संपणाऱ्या व नव्याने स्थापित होणाऱ्या रायगड जिल्ह्यातील पाच ग्रामपंचायतींची सार्वत्रिक; तर 142 ग्रामपंचायतींची पोटनिवडणूक डिसेंबरमध्ये होण्याची शक्‍यता आहे. 

जिल्ह्यातील महाड तालुक्‍यातील मुमुर्शी, भोमजई, पिंपळकोंड; तर कर्जत तालुक्‍यातील तिवरे व वरईतर्फे निड या पाच ग्रामपंचायतींची मुदत डिसेंबर ते मार्चमध्ये संपणार आहे. या 5 ग्रामपंचायती सार्वत्रिक; तर अन्य 142 ग्रामपंचायतींची पोटनिवडणूक डिसेंबरमध्ये होणार आहे. पोटनिवडणूक असलेल्या ग्रामपंचायतींमध्ये 14 सरपंच व 223 सदस्यपदांची निवडणूक होणार आहे. त्यामुळे या ग्रामपंचायतींचा मतदार यादीचा कार्यक्रम जाहीर करण्यात आला आहे.

1 नोव्हेंबरला प्रभागनिहाय प्रारूप मतदार यादी प्रसिद्ध करण्यात आली आहे. त्यानंतर 5 नोव्हेंबरपर्यंत त्यावर हरकती व सूचना दाखल करण्यात येणार आहेत. 6 नोव्हेंबरला प्रभागनिहाय अंतिम मतदार यादी प्रसिद्ध केली जाणार आहे. ही प्रक्रिया आठ दिवसांत राबविण्यात येणार असून तालुका तहसीलदार यांना सूचना करण्यात आल्या आहेत. त्यानुसार कामेही सुरू झाली आहेत.