मुंबई- संस्कारी बाबू म्हणून ओळख असलेले अभिनेते आलोक नाथ यांच्यावर अखेर बलात्काराचा गुन्हा दाखल करण्यात आला आहे. आलोकनाथ यांच्याविरोधात लेखिका विनता नंदा यांनी एक लेखी तक्रारपत्र ओशिवरा पोलिसांना दिले होते. 

या पत्रात, 19 वर्षांपूर्वी आलोकनाथ यांनी बलात्कार केल्याचा आरोप विनता नंदा यांनी केला होता. याप्रकरणी मंगळवारी (20 नोव्हेंबर) ओशिवरा पोलिसांनी त्यांच्याविरोधात दखलपात्र गुन्ह्याची नोंद केली. मात्र अद्यापपर्यंत त्यांना अटक करण्यात आलेली नाही. 

त्यावेळी तक्रारीची शाहनिशा केल्यानंतरच त्यांच्यावर गुन्हा दाखल करण्यात येईल, असे ओशिवरा पोलिसांकडून सांगण्यात आले होते. अखेर मंगळवारी दुपारी त्यांच्यावर गुन्हा दाखल करण्यात आला. जबरदस्ती आणि अनैसर्गिक संभोग केल्याप्रकरणी 376(1) आणि 177 या कलमानुसार त्यांच्यावर गुन्हा दाखल करण्यात आला आहे.

दरम्यान, काही दिवसांपूर्वी अभिनेत्री तनुश्री दत्ता हिने नाना पाटेकर यांच्या विरोधात केलेल्या आरोपांनंतर बॉलिवूडसह कॉर्पोरेट जगतातही "मी टू' मोहिमेमुळे खळबळ उडाली होती. तसेच, काही दिवसांपूर्वी लेखिका विनता यांनी फेसबुकवर पोस्ट अपलोड केली होती. त्यांनी आलोकनाथ यांच्या विरोधात बलात्काराचा आरोप केला होता.