मुंबई - इंदू मिलमध्ये ‘भारतरत्न’ डॉ. बाबासाहेब आंबेडकर यांचे स्मारक उभारण्यात येणार आहे. प्रत्यक्षात हे स्मारक कसे असेल, याची प्रतिकृती प्रजासत्ताक दिनी शिवाजी पार्कमधील संचलनात पाहण्यास मिळणार आहे. एमएमआरडीएकडून डॉ. बाबासाहेब आंबेडकर यांच्या इंदू मिलवरील स्मारकाच्या प्रतिकृतीवर चित्ररथ साकारण्यात येत आहे. याचे काम वांद्रे-कुर्ला संकुलातील सीबीआय कार्यालयाजवळील मैदानावर सुरू आहे. 

डॉ. आंबेडकरांना अभिवादन करण्यासाठी आणि मानवतेचा संदेश देण्यासाठी या वर्षी प्रजासत्ताक दिनाच्या संचलनात त्यांच्या स्मारकाच्या प्रतिकृतीचा चित्ररथ तयार करण्यात येणार आहे. या चित्ररथाचे काम जे. जे. स्कूल ऑफ आर्टचे माजी प्राध्यापक नरेंद्र विचारे करत आहेत. या चित्ररथाची कल्पना एमएमआरडीएचे जनसंपर्क अधिकारी दिलीप कवटकर यांची आहे. 

चित्ररथाचा आकार २९ फूट लांब १३ फूट रुंद आणि १६ फूट उंच असा आहे. या चित्ररथात बाबासाहेबांचे भव्य शिल्प साकारण्यात आले आहे. या चित्ररथाद्वारे ‘मार्ग समतेचा..विचार मानवतेचा..’ हा संदेश देण्यात येणार आहे. चित्ररथाचे काम अंतिम टप्प्यात सुरू असून शुक्रवारी हा चित्ररथ शिवाजी पार्क येथे नेण्यात येणार असल्याचे प्रा. विचारे यांनी सांगितले.