मुंबई - चार वर्षे सत्तेत राहून विरोधाची धार कायम ठेवणाऱ्या शिवसेनेने यंदाच्या दसरा मेळाव्यातून प्रतिस्पर्धी भाजपला शह देण्याची तयारी केली आहे. उद्या (ता. १८) ‘शिवतीर्था’वरील दसरा मेळाव्याला पाच लाख शिवसैनिक जमा करण्याचे लक्ष्य ठरवून देण्यात आले असून, गावखेड्यांतून त्याची तयारी करण्यात आली आहे. ‘वज्रमूठ हिंदुत्वाची’ असे या दसरा मेळाव्याचे घोषवाक्‍य ठरवत भारतीय जनता पक्षाच्या हिंदुत्वाला आव्हान देण्याचा प्रयत्न उद्धव ठाकरे करणार असल्याचे मानले जात आहे. 

राम मंदिर उभारणीचा मुद्दा ऐरणीवर आलेला असताना ‘चलो अयोध्या’ असा नारा देत उद्धव ठाकरे हे ‘मिशन अयोध्या’ची घोषणा या वेळी करतील अशी शक्‍यता वर्तविली जात आहे. 

अयोध्येला जाऊन थेट राम मंदिराच्या उभारणीची वीटच रचण्याची प्रतिज्ञा या मेळाव्यातून शिवसेना करेल, असे अंदाज बांधले जात आहेत. त्यामुळे, उद्याचा दसरा मेळावा हा शिवसेनेच्या भाजपविरोधातल्या निर्णायक संघर्षाची नांदी ठरेल, असा दावा करण्यात येत आहे. या मेळाव्यासाठी पहिल्यांदाच शिवसेनेने अत्यंत सूत्रबद्ध आखणी केली आहे. प्रत्येक तालुक्‍यातील नेत्यांना त्यासाठी कामाला लावण्यात आले आहे.

ताकद दाखवणारच
यंदाच्या दसरा मेळाव्यात ‘आता ताकद दाखवणारच’ असा निर्धार उद्धव ठाकरे यांनी केला आहे. त्यासाठी गर्दीचा उच्चांक व्हावा यासाठी नेत्यांना तंबीदेखील देण्यात आली आहे. पाच लाखांची गर्दी करत भाजपवर राजकीय दबावतंत्राचा वापर करण्याचे शिवसेनेने डावपेच आखल्याचे समजते.