मुंबई  : एसटी महामंडळाने दिवाळीच्या काळात 10 टक्के हंगामी दरवाढ करण्याचा निर्णय घेतला आहे. 25 ऑक्‍टोबर ते 5 नोव्हेंबरपर्यंत ही हंगामी भाडेवाढ सुरू राहणार आहे. 
गर्दीच्या हंगामात महसूल वाढीच्या दृष्टीने 30 टक्‍क्‍यांपर्यंत हंगामी भाडेवाढ करण्याचा अधिकार राज्य परिवहन प्राधिकरणाने एसटीला दिला आहे. त्यानुसार या वर्षीदेखील 10 टक्के भाडेवाढ 24 ऑक्‍टोबरच्या मध्यरात्रीपासून लागू होणार आहे. साधी (परिवर्तन), निमआराम (हिरकणी) व शिवशाही (आसन, शयनयान) बससेवेसाठी 10 टक्के भाडेवाढ लागू आहे; मात्र शिवनेरी व अश्‍वमेध बससेवेला ही भाडेवाढ लागू होणार नाही. हंगामी भाडेवाढ 5 नोव्हेंबरपर्यंत लागू राहणार असल्याचे एसटी महामंडळाकडून सांगण्यात आले आहे. 

भाडेवाढीचा निर्णय जाहीर होण्यापूर्वी ज्या प्रवाशांनी 25 ऑक्‍टोबर ते 5 नोव्हेंबरदरम्यानच्या प्रवासासाठी आगाऊ आरक्षण केले असतील, त्यांना प्रवासावेळी प्रवासभाड्यातील वाढीव रक्कम द्यावी लागेल, अशी माहिती एसटी महामंडळाच्या वतीने देण्यात आली.