मुंबई - राज्यातील १७ सरकारी वैद्यकीय महाविद्यालये व रुग्णालयांतील चतुर्थ श्रेणी कर्मचारी मंगळवारपासून (ता. ५) बेमुदत संपावर जाणार आहेत. या रुग्णालयांत मुंबईतील जे. जे. समूह रुग्णालयातील जे. जे., कामा, सेंट जॉर्जेस आणि जी. टी. या चारही रुग्णालयांचा समावेश आहे. नोकरीत कायम करण्याचे आश्‍वासन सरकारने न पाळल्याच्या निषेधार्थ हा बेमुदत संप पुकारण्यात आला आहे. 

चतुर्थ श्रेणीतील २९ दिवसांच्या बदली कर्मचाऱ्यांना कायमस्वरूपी केले जाईल, हे आश्‍वासन सरकारने न पाळल्याच्या निषेधार्थ बेमुदत संप पुकारला आहे, अशी माहिती राज्य सरकारी चतुर्थ श्रेणी कर्मचारी मध्यवर्ती संघटनेचे सरचिटणीस प्रकाश बने यांनी दिली. या संपात राज्यभरातील एकूण ११ हजार चतुर्थ श्रेणी कर्मचारी सहभागी होणार आहेत. त्याचप्रमाणे काही कायमस्वरूपी कर्मचारीही संपात सहभागी होण्याची शक्‍यता आहे. संपाला काही दिवसांत नर्सिंग फेडरेशनकडूनही पाठिंबा जाहीर होण्याची शक्‍यता असल्याचे सूत्रांनी सांगितले. कर्मचाऱ्यांना नोकरीत कायम करण्याचा निर्णय मंगळवारच्या मंत्रिमंडळ बैठकीत न झाल्यास बेमुदत संप अटळ असेल, असा इशारा संघटनेने दिला आहे.