मुंबई - बायोमेट्रिक यंत्रांच्या तांत्रिक दोषामुळे एप्रिल महिन्याचे वेतन पालिकेच्या हजारो कर्मचाऱ्यांना वेळेवर मिळाले नसल्याने कामगार-कर्मचाऱ्यांमध्ये रोष निर्माण झाला होता. उद्या सोमवारअखेर (ता. १३) कर्मचाऱ्यांना वेतन मिळणार आहे. पालिकेने तसे पत्रक काढून जाहीर केल्याने कर्मचाऱ्यांना दिलासा मिळाला आहे. 

बायोमेट्रिकच्या दोषामुळे कर्मचाऱ्यांच्या हजेरीची नोंद न झाल्याने एप्रिल महिन्याचे वेतन कर्मचाऱ्यांना मिळालेले नाही. त्यात निवडणुकीच्या कामासाठी गेलेल्या हजारांहून अधिक कर्मचाऱ्यांचा मोठ्या प्रमाणात समावेश आहे. पगार न मिळाल्याने पालिकेतील कर्मचारी हवालदिल झाले होते. त्याविरोधात कर्मचारी संघटनाही आक्रमक झाल्या आहेत. कर्मचाऱ्यांची कार्यालयातील उपस्थितीची नोंद करण्यासाठी पालिकेने वर्षभरापूर्वी हजेरीपट पद्धत बंद करून बायोमेट्रिक पद्धत सुरू केली. 

बायोमेट्रिक आणल्यापासून हा घोळ कायम असल्याने कामगार संघटनांनी याला आंदोलनाच्या माध्यमातून विरोध केला. बायोमेट्रिक यंत्रांना पुरेशी इंटरनेट कनेक्‍टिव्हिटी नसल्याने कर्मचारी हजर असल्यास गैरहजर दाखवणे, शिफ्ट करणाऱ्या कर्मचाऱ्यांची योग्य नोंद न होणे, कर्मचाऱ्यांनी घेतलेल्या रजांची आणि ड्युटी बदलाची प्रणालीत नोंद न होणे, अशा अनेक समस्या असल्याचा दावा कामगार संघटनांनी केला आहे. 

शून्य वेतनाची स्लिप
नैमित्तिक रजा, साप्ताहिक सुटीच्या यंत्रणेत अपडेट होणे गरजेचे असतानाही त्याऐवजी कामावर न आल्याचा शेरा पडल्याने काहींना   वेतनचिठ्ठीत शून्य दाखवले आहे; तर काहींच्या वेतनात मोठ्या प्रमाणात कपातही झाली आहे. सॅप प्रणाली की मानव संसाधन विभागाने हे काम करायचे, या वादात हा गोंधळ निर्माण झाला असल्याचे कर्मचारी संघटनेने म्हटले आहे.