घाटकोपर : आमदार नितेश राणे (Nitesh Rane) यांनी पुन्हा वादग्रस्त ट्विट (Controversial statement) केल्याने शिवसैनिक (Shivsena) विरुद्ध राणे नवीन वाद निर्माण झाला आहे. शिवसैनिकांमध्ये संताप असून घाटकोपर पोलीस ठाण्यात (Ghatkopar police station) गुन्हा दाखल (Police complaint) करण्याची मागणी त्यांनी केली आहे. (shivsena demands police complaint Against nitesh rane on controversial tweet)

राणे यांनी शिवसैनिकांमध्ये तेढ निर्माण करणारे ट्विट केल्याने त्यांच्यावर गुन्हा दाखल करण्यात यावा, अशी मागणी शिवसेनेचे ईशान्य मुंबईचे विभागप्रमुख राजेंद्र राऊत यांनी घाटकोपर पोलिसांकडे केली आहे. याबाबत त्यांनी आपले लेखी निवेदन पोलिसांना दिले. २२ डिसेंबर रोजी सकाळी दहाच्यादरम्यान नितेश राणे यांनी आपल्या ट्विटर अकाऊंटवरून एक ट्विट केले होते. त्यात त्यांनी ‘तमाम हिंदूंच्या माँसाहेब जिजामाता भोसले यांच्या नावाने असलेल्या उद्यानाचे नाव रातोरात हजरत पिर बाबा अशी कोनशिला लावून बदलले आहे.

आता सत्तेच्या लाचारीसाठी बाळासाहेबांच्या शिवसेनेचे नाव बदलणार का’, असे म्हटले आहे. हे ट्विट सामाजिक तेढ निर्माण करणारे असून संविधानिक पद असलेल्या राज्याचे मुख्यमंत्री उद्धव ठाकरे यांची बदनामी करणारे आहे. या ट्विटचा काहीही संबंध जिजामाता उद्यानाशी नाही. त्यामुळे अशा खोट्या बातम्या पसरवून सामाजिक आणि धार्मिक भावना भडकावून दोन समाजात जातीय दंगल घडवून आणून सामाजिक सलोखा बिघडवण्याचा नितेश राणे यांचा प्रयत्न असून, हे कृत्य समाज विघातक आहे.

त्यामुळे त्यांच्यावर गुन्हा दाखल करण्यात यावा, अशी मागणी सेनेचे विभागप्रमुख राजेंद्र राऊत यांनी घाटकोपर पोलिस ठाण्यात केली आहे. अन्य ठिकाणीही तक्रारी यावेळी उपविभाग प्रमुख सुनील मोरे, विलास पवार, तात्या सारंग आदींसह पदाधिकारी उपस्थित होते. अशाच तक्रारी शिवाजीनगर, देवनार, मानखुर्द, पंतनगर, पार्कसाईड पोलिस ठाण्यात करण्यात आल्याचे विभाग प्रमुख राजेंद्र राऊत यांनी सांगितले.