‘मेरी मिट्टी मेरा देश’ अभियानांतर्गत पाच उपक्रम

सकाळ वृत्तसेवा
अलिबाग, ता. ५ : आझादी का अमृतमहोत्सवाच्या समारोप कार्यक्रमांतर्गत गाव ते शहरांपर्यंत आपल्या मातीविषयी जनजागृती, प्रेम आणि साक्षरता निर्माण व्हावी, यासाठी ‘मेरी मिट्टी मेरा देश’ अभियान जिल्ह्यात प्रभावीपणे राबविण्यात येणार असल्याची माहिती जिल्हा परिषदेचे मुख्य कार्यकारी अधिकारी डॉ. भरत बास्टेवाड व ग्रामपंचायत विभाग उपमुख्य कार्यकारी अधिकारी राजेंद्र भालेराव यांनी दिली आहे.
तालुकास्तरावर प्रत्येक गावातील माती एका कलशात जमा करून हा कलश २७ ते ३० ऑगस्टदरम्यान प्रधानमंत्री यांच्या कार्यक्रमासाठी पाठविण्यात येणार असून उपक्रमांच्या तयारीसाठी डॉ. भरत बास्टेवाड यांनी अधिकाऱ्यांना सूचना केल्‍या आहेत. अभियानात जिल्ह्यातील सर्व ८०९ ग्रामपंचायती, १५ पंचायत समित्यांनी योगदान देणे अभिप्रेत आहे. अभियानांतर्गत ९ ते १४ ऑगस्ट यादरम्यान कोणत्याही एका दिवशी पाच उपक्रम आयोजित करण्यात येणार आहेत. शुक्रवारी दूरदृश्‍यप्रणालीच्या माध्यमातून घेण्यात आलेल्या बैठकीत जिल्हा ग्रामीण विकास यंत्रणा प्रकल्प संचालक प्रियदर्शनी मोरे, पाणी व स्वच्छता विभाग उपमुख्य कार्यकारी अधिकारी शुभांगी नाखले, जिल्हा माहिती अधिकारी मनिषा पिंगळे यांसह विविध विभागांचे अधिकारी व गटविकास अधिकारी सहभागी झाले होते.

उपक्रमाची तयारी
• शिलाफलक लावणे - गावातील संस्मरणीय एका ठिकाणी शिलाफलकाची उभारणी करण्यात येणार आहे. शिलाफलकावर लिहिण्यासाठी ग्रामपंचायत कार्यक्षेत्रातील ज्यांनी देशासाठी स्वातंत्र्यासाठी व सुरक्षेसाठी बलिदान दिले, अशा थोर व्यक्तींची नावे निश्चित करून शिलाफलकाची उभारणी करण्यात येईल.
• वसुधा वंदन - गावातील योग्य ठिकाण निवडून वसुधा वंदन म्हणून ७५ देशी वृक्षांच्या रोपांची लागवड करून अमृत वाटिका करण्यात येईल.
• स्वातंत्र्यसैनिक, वीरांना वंदन - ग्रामपंचायत कार्यक्षेत्रातील ज्यांनी देशासाठी, स्वातंत्र्यासाठी व सुरक्षेसाठी बलिदान केलेल्या, निवृत्त वीरांचा, स्वातंत्र्यसैनिक यांच्या परिवारातील सदस्य यांचा कार्यक्रमावेळी सन्मान करण्यात येईल.
• पंचप्रण (शपथ) घेणे - देशाच्या विकासासाठी ग्रामपंचायत स्तरावरील सर्व अधिकारी कर्मचारी, लोकप्रतिनिधी, गावकऱ्यांनी शपथ घेण्यात येईल.
• प्रत्येक घरावर झेंडावंदन - प्रत्येक घरावर तिरंगा ध्वज फडकविण्यात येणार आहे.