मुलापेक्षा आई सरस
दहावीच्या परीक्षेत दोघेही उत्तीर्ण; वृषाली गायकर यांची जिद्द
अमित गवळे : सकाळ वृत्तसेवा
पाली, ता. २० (वार्ताहर)ः शिक्षण अर्धवट सोडले तरी जर जिद्द असेल तर यश नक्कीच मिळते, याचे जिवंत उदाहरण म्हणजे पेण तालुक्यातील खारपाले येथील वृषाली पांडुरंग गायकर. नुकत्याच झालेल्या दहावीच्या परीक्षेत त्या व त्यांचा मुलगा एकाचवेळी उत्तीर्ण झाले असून, वृषाली गायकर यांना मुलापेक्षा अधिक गुण मिळाले आहेत.
काही कारणास्तव वृषाली यांना शिक्षण थांबवावे लागले होते. दरम्यान, प्रथम एज्युकेशन फाउंडेशनच्या सेकंड चान्स प्रोग्रॅम अंतर्गत त्यांनी पुन्हा शिक्षणाला सुरुवात केली. संस्थेने केलेले मार्गदर्शन, क्लासेस, सराव आणि सातत्य यामुळे वृषाली यांनी आत्मविश्वासाने दहावीची परीक्षा दिली आणि थेट प्रथम संस्थेच्या सेकंड चान्स प्रोग्रॅमच्या पेण तालुक्यातील पहिल्या बॅचमध्ये ७१.८० टक्के गुण मिळवत पेण तालुक्यात प्रथम क्रमांक मिळवला.
मुलगाही झाला दहावीत उत्तीर्ण
वृषाली यांचा मुलगादेखील दहावीमध्ये याच वर्षी शिक्षण घेत होता. त्याचे नाव वंश लक्ष्मण गायकर. त्याने यावर्षी दहावीमध्ये ६७ टक्के गुण मिळवले आहेत. शिक्षणासाठी स्वतःचा प्रवास पुन्हा सुरू करून त्याच प्रेरणेने मुलालाही शिक्षणात मार्गदर्शन करणे, ही एक आई म्हणून वृषाली यांची दुहेरी जबाबदारी होती. त्यांनी ही जबाबदारी अत्यंत चोखपणे पार पाडली.
वृषाली यांच्या या यशामागे त्यांची मेहनत, चिकाटी आणि प्रथम संस्थेच्या सेकंड चान्स प्रोग्रॅमचा मोठा वाटा आहे. वृषाली यांचे उदाहरण नक्कीच इतर अनेक महिलांना आणि शिक्षण अर्धवट सोडलेल्या व्यक्तींना पुन्हा उभारी घेण्यासाठी प्रेरणा देईल.

फोटो ओळ
पाली ः वृषाली पांडुरंग गायकर व मुलगा वंश गायकर