जेएसडब्ल्यू प्रकल्पाला कुसुंबळे ग्रामस्थांचा पाठिंबा
अलिबाग, ता. १८ (बातमीदार) : कुसुंबळे ग्रामपंचायतीत स्वातंत्र्यदिनाच्या औचित्याने आयोजित विशेष ग्रामसभेत जेएसडब्ल्यू कंपनीच्या फेज थ्री प्रकल्पाला ग्रामस्थांनी जोरदार समर्थन दिले. शिवसेनेचे रायगड जिल्हाप्रमुख राजा केणी यांच्या अध्यक्षतेखाली झालेल्या या सभेत नागरिकांनी हात वर करून प्रकल्पाच्या विस्तारास मंजुरी देण्याची एकमुखी मागणी केली.
या सभेत वाढत्या बेरोजगारीचा मुद्दा ठळकपणे पुढे आला. अलिबाग व पेण तालुक्यातील अनेक तरुण उच्च शिक्षण घेतल्यानंतरही रोजगाराविना भटकंती करत असल्याने निराश झाले आहेत. कामाच्या शोधात अनेकांना स्थलांतर करावे लागत आहे. या पार्श्वभूमीवर जेएसडब्ल्यू कंपनीचे विस्तारीकरण तरुणांना रोजगाराची नवी संधी देणारे ठरेल, असा विश्वास ग्रामस्थांनी व्यक्त केला. आमच्या मुलांना रोजगार मिळावा, यासाठी कंपनीचे विस्तारीकरण झालेच पाहिजे, असा ठाम पवित्रा त्यांनी घेतला.
विशेष ग्रामसभेत ग्रामपंचायतीचे सर्व पदाधिकारी उपस्थित होते. नागरिकांनी विषय चर्चेत आणत कंपनीच्या समर्थनार्थ ठराव मंजूर करून घेण्याचा निर्णय लावून धरला. ग्रामसभेत तब्बल ९३५ नागरिकांनी सह्या करून प्रकल्पाच्या बाजूने भूमिका नोंदवली. या वेळी पावसाचा जोर कायम असूनही ध्वजारोहणानंतर हजारो ग्रामस्थ मोठ्या संख्येने सभेला उपस्थित होते, हे विशेष. ग्रामस्थांच्या या भूमिकेचा थेट परिणाम २२ ऑगस्ट रोजी होणाऱ्या जनसुनावणीवर होणार आहे. नागरिकांनी हात वर करून कंपनीला आपला पाठिंबा जाहीर करत प्रकल्प मंजुरीसाठी एकमताने समर्थन दर्शवले. बेरोजगारीच्या छायेतून सुटका आणि स्थानिक तरुणांसाठी स्थिर भविष्य निर्माण करण्यासाठी हा प्रकल्प महत्त्वपूर्ण ठरणार असल्याची भावना सर्वत्र व्यक्त होत आहे.