मुसळधार पावसाचा वन्यजीवांना फटका
मुंबई-गोवा महामार्गावर जखमी अवस्थेतील मगर सापडली
अमित गवळे ः सकाळ वृत्तसेवा
पाली, ता. १८ (वार्ताहर)ः दोन-तीन दिवसांपासून कोसळणाऱ्या मुसळधार पावसाने एकीकडे जनजीवन विस्कळित झाले आहे, तर दुसरीकडे वन्यजीवांना फटका बसत असून, रविवारी (ता. १७) रात्री मुंबई-गोवा महामार्गावर जखमी अवस्थेतील मगर आढळून आली.
मुंबई-गोवा महामार्गालगत माणगावातील राऊत सर्जिकल हॉस्पिटलच्या समोर साठलेल्या पाण्याच्या डबक्यात स्थानिकांना मगर दिसून आली. याबाबतची माहिती वन्यजीव रक्षक शंतनू कुवेसकर यांना वन विभाग व सह्याद्री वन्यजीव रक्षणार्थ संस्थेच्या सदस्यांना दिली. वन विभाग, वन्यजीव रक्षकांनी रात्री दहाच्या सुमारास या मगरीला सुरक्षित पकडले. साधारण चार फूट लांबीच्या मगरीच्या अंगावरून वाहन गेल्याने तिला दुखापत झाली होती. तिच्या तोंडातून रक्त येत होते. तसेच पाठीमागचे दोन्ही पाय अधू झाले होते. पशुवैद्यकीय केंद्रात प्राथमिक उपचार केल्यानंतर मुख्य वनरक्षक प्रवीण एन. आर. यांनी पुढील उपचारासाठी तिला पुणे येथे रेस्क्यू संस्थेकडे पाठवले.
-------------------------------
नद्यांच्या पाणीपातळीत वाढ
मुसळधार पाऊस सुरू असल्याने नदीची पाणीपातळी वाढली आहे. त्यामुळे मगर मानवी वस्तीमध्ये येण्याचा धोका अधिक आहे. त्यामुळे मगर दिसल्यास तिला जवळून निरखून पाहण्यासाठी जाऊ नये. तसेच तत्काळ वन विभाग आणि वन्यजीव रक्षकांना संपर्क करावा, असे आवाहन सह्याद्री वन्यजीव रक्षणार्थ संस्थेचे सागर दहिंबेकर यांनी केले.
-------------------------------
पाली ः मुंबई-गोवा महामार्गावर जखमी अवस्थेतील मगर आढळली होती.