खोपोली, ता. २१ (बातमीदार) ः मार्च महिन्यापर्यंत व २०२२-२३ या आर्थिक वर्षासाठी जास्तीत जास्त कर वसुलीचे उद्दिष्ट गाठण्यासाठी खोपोली नगरपालिकेकडून मालमत्ता व पाणीपट्टी कर वसुलीची जोरदार मोहीम सुरू करण्यात आली आहे. याला नागरिकांकडूनही उत्तम प्रतिसाद मिळत असून, कर भरणा करण्यासाठी पालिकेत रांगा लागत आहेत.
मार्च महिना सुरू होताच पालिकाकडून कर वसुलीचे उद्दिष्ट पूर्ण करण्यासाठी जोरदार मोहीम सुरू आहे. एका बाजूला थकबाकीदारांना नोटिसा बजावणे, नळजोडणी खंडित करणे असे कारवाईचे हत्यार पालिकाकडून उगारण्यात येत आहे. नागरिकांना कर भरणा अधिक सोपा व्हावा, यासाठी शहरातील विविध रहिवासी भागात विशेष वसुली पथक नियुक्त करून कॅम्प लावून वसुली करण्यात येत आहे. कारवाई टाळण्यासाठी नागरिकांकडून प्रतिसाद मिळत असून कर भरण्यासाठी पालिकेत रांगा लागत आहेत.

नगरपालिका कार्यालयात पाणीपट्टी व मालमत्ता कर भरणा सुरळीत व्हावा यासाठी अतिरिक्त खिडक्या सुरू केल्‍या आहेत. यात रोख रक्कम, धनादेश व डेबिट कार्ड व ऑनलाईन पद्धतीने कर भरण्याची सुविधा उपलब्‍ध करून देण्यात आली आहे. कर वसुली मोहीमेंतर्गत आठ दिवसांत दररोज सरासरी दहा लाखांच्या वर कर वसुली होत आहे. कारवाई टाळण्यासाठी नागरिकांनी तातडीने पाणीपट्टी व मालमत्ता कर भरावा.
- अनुप दुरे, मुख्याधिकारी, खोपोली

खोपोली : कर भरण्यासाठी पालिका कार्यालयात गर्दी होत आहे.